Top.Mail.Ru

Сайт нұсқасы

ru kz

Зектілері

МӘМС бойынша кім тісін тегін емдете алады

Опубликовано:

МӘМС бойынша кімдер тісін тегін емдете алады
Тіс дәрігері мен науқас. Көрнекі сурет: pixabay.com

Қазақстандықтар мемлекеттік әлеуметтік сақтандыру шеңберінде көптеген медициналық қызметті тегін ала алады. Осы орайда 2023 жылы ел тұрғындары тісін тегін емдете ала ма? Бұл сұраққа KAZ.NUR.KZ тілшісі жауап іздеп көрді.

Тегін медициналық қызметті алу үшін мемлекетік әлеуметтік сақтандыру қорына ай сайын тиісті жарналар төленуі керек. Сондай-ақ әлеуметтік медициналық сақтандыру қорымен (ӘМСҚ) келісімшарты бар медициналық мекемеге хабарласу қажет.

"2023 жылдың 1 қаңтарына дейін стоматологиялық емдеу мекемелерімен тікелей келісімшарт болмады. Барлығы емханалар арқылы жүзеге асты", - деп хабарлайды ӘМСҚ баспасөз қызметі.

Қордың ресми өкілі Ирина Подскочаяның айтуынша, бұған дейін тікелей келісімшарттың болмауы салдарынан МӘМС арқылы кей медицианлық мекеме жеткілікті түрде тиімді жұмыс істемеген. Енді келісімшарт тікелей қор мен стоматологиялық емдеу мекемелер арасында болады.

МӘМС бойынша кімдер тісін тегін емдете алады
Тіс дәрігері. Көрнекі сурет: pixabay.com

"Бұдан былай стоматологиялық емханалар қанша қызмет атқарғанын және қормен келісім бойынша қаншасы қалғанын жеке қадағалап отыруы керек. Бұрын бұл жұмыстарды бекітілген емханалар жасайтын, емхана тарапынан бұл процесті бақылау өте қиын болды", - дейді ӘМСҚ өкілі.

Оның айтуынша, аталған механизм әлсіз болғандықтан, заңсыз әрекеттер де орын алған және алдағы уақытта бұндай олқылықтарды болдырмау жеңілдей түседі.

Қазақстандықтарды қандай өзгерістер күтіп тұр

Келісімшарт құруға қатысты өзгерістер пациенттерге еш әсер етпейді. Бұрынғыдай тегін стоматологиялық көмекті халықтың жекелеген санаты ғана ала алады. Аталған қызмет әлі де кез келген азаматқа қолжетімді емес.

Ал шұғыл стоматологиялық көмек кепілдендірілген тегін медициналық көмек пакеті шеңберінде, халықтың әлеуметтік жағынан аз қорғалған санаттарына ғана көрсетіледі. Олар:

  • балалар;
  • жүкті әйелдер;
  • зейнеткерлер;
  • жұқпалы және әлеуметтік маңызы бар сырқаттармен ауыратын науқастар;
  • 1, 2, 3 топтағы мүгедектер, мүгедек баланы немесе бірінші топтағы мүгедекті күтушілер (жұмыссыз).
  • атаулы әлеуметтік көмек алушылар;
  • Көпбалалы аналар.
МӘМС бойынша кімдер тісін тегін емдете алады
Науқас. Көрнекі сурет: pixabay.com

Бір сөзбен айтқанда, өзгерістер тек бөлінген қаражаттың тиімді жұмсалуын, науқастардың ақшасы орынсыз жұмсалмауын қадағалауға мүмкіндік береді.

Қандай стоматологиялық қызметтерді тегін алуға болады

Ирина Подскочаяның айтуынша, тегін міндетті әлеуметтік медициналық сақтандыру жүйесі шеңберінде алуға болатын стоматологиялық қызметтердің тізімі айтарлықтай үлкен. Жекелеген санаттағы азаматтар тісін жұлдыртып, пломба салдыртып, сонымен қатар анестезия, басқа да медициналық қызметтерді ала алады. Ал жақ-бет аймағының туа біткен патологиясы бар балаларға амбулаторлық деңгейде МӘМС аясында ортодонтиялық пластинка орнату мүмкіндігі бар.

Стоматологиялық қызметті алуға құқылы жекелеген санаттағы азаматтар ӘМСҚ-мен келісімшарты бар стоматологиялық емхананы өзі таңдай алады. Медициналық мекеме науқасты қабылдаудан бас тартса, 1406 нөміріне хабарласуға болады.

Мақаланың түпнұсқасы: https://kaz.nur.kz/nurfin/2008418-mams-boiynsa-kim-tisin-tegin-emdete-alady/