Заңнамадағы өзгерістерге байланысты 1,4 млн қазақстандықтың зейнетақысы өсті

Елімізде инфляция деңгейі 2 пайызға артып, мемлекеттік зейнетақы төлемдерін тағайындау параметрлерін өзгерту есебінен 1,4 милионнан астам адамның зейнетақысы қосымша өсті. Бұл туралы Еңбек және Халықты әлеуметтік қорғау министрлігі ресми сайтында хабарлады.

Елімізде жыл сайын зейнетақы мөлшері өседі.

Ведомство мәліметінше, осы жылдың басында базалық зейнетақының ең төменгі мөлшері 54 пайыздан 60 пайызға дейін көтерілді. Бұл өсім, ең алдымен, ең төменгі зейнетақы алушыларға бағытталған. Олар үшін базалық зейнетақының өсуі 21 пайызды құрады.

Бес жыл ішінде базалық зейнетақы мөлшері орта есеппен 50 пайызға дейін артады және бұл Қазақстанның барлық зейнеткерлеріне (бүгінгі күні 2,3 млн адам) қатысты болады.

Бұл ретте базалық зейнетақы мөлшері ең төменгі күнкөріс деңгейінің инфляция деңгейіне өзгеруіне байланысты жыл сайын арттырылады.

"2023 жылғы 1 қаңтардан бастап зейнеткерлікке шығатын азаматтар үшін ынтымақты зейнетақыны есептеу үшін пайдаланылатын ең жоғары табыс мөлшері 46-дан 55 айлық есептік көрсеткішке дейін ұлғайтылды", - делінген хабарламада.

Министрлік ақпаратынша, егер өткен жылы жасына байланысты зейнетақыны есептеу үшін ескерілетін ең жоғары табыс 46 АЕК немесе 146 мың теңгені құраса, енді оны 55 АЕК-ке дейін арттырған кезде ол биыл шамамен 190 мыңын құрайды, бұл зейнетақы мөлшеріне тікелей әсер етті.

Бұл өзгеріс зейнеткерлер мен енді зейнетке шыққан азаматтарға да әсер етті.

Зейнетақыны есептеу кезінде қабылданатын ең жоғары табыстың артуы тағайындалған ынтымақты зейнетақылардың мөлшерін ұлғайтты және зейнетақы алдындағы кезеңдегі зейнетақы мен жалақы мөлшерінің салыстырымдылығын қамтамасыз етті.

"Бұл ретте, тағайындалған ынтымақты зейнетақы мөлшері инфляция деңгейінен 2 пайызға артып жыл сайын өсіп отыратынын атап өткен жөн.

Жоғарыда аталған барлық шаралар Әлеуметтік кодексте көзделген және зейнетақы жүйесінің тиімділігін арттыруға әрі азаматтарды зейнетақының барабар мөлшерімен қамтамасыз етуге мүмкіндік береді", - делінген хабарламада.