Алматыда тарифтердің өсуіне байланысты өтемақы кімдерге төленеді

Коммуналдық қызметтер бағасының өсуіне байланысты өтемақы мөлшері қаншаға өседі, тұрғын үйді жалға алып отырғандарға мұндай өтемақы төленеме ме? Бұл сұраққа мамандар өңірлік коммуникациялар қызметінде өткен брифингте жауап берді, хабарлайды KAZ.NUR.KZ.

Алматы қаласы Жұмыспен қамту және әлеуметтік бағдарламалар басқармасының басшысы Бауыржан Жаубасовтың айтуынша, Алматыда халықтың әлеуметтік осал топтары санатына жататын 315 мың адам тұрады.

"Инвестицияларға айырбастау тарифі" бағдарламасы аясында әкімнің тапсырмасы бойынша 2023 жылғы 1 шілдеден бастап мөлшері 0,5 айлық есептік көрсеткіште (1725 теңге) болатын коммуналдық қызметтер бағасының өсуіне байланысты халықтың әлеуметтік осал топтарының 8 жекелеген санатына өтемақы төлеу түрінде әлеуметтік көмек көрсетіледі", - деді Бауыржан Жаубасов.

Ол 2023 жылғы 1 қарашадан бастап электр энергиясына бағаның өсуіне байланысты әлеуметтік көмек мөлшері 0,6 АЕК-ке (2070 теңге) дейін ұлғайтылғанын айтты. 2024 жылы жергілікті бюджеттен 0,6 АЕК мөлшерінде өтемақы төлеу үшін 4,1 млрд теңге бөлінген.

"Халықтың әлеуметтік осал топтарына қосымша әлеуметтік қолдау шараларын көрсету және қаржылық жүктемені азайту үшін қолданыстағы әлеуметтік көмектің мөлшерін 2024 жылғы 1 наурыздан бастап, ережелерге тиісті өзгерістер енгізе отырып, 0,75 АЕК (2769 тг.) дейін арттыру ұсынылады", - деп атап өтті салалық басқарма басшысы.

Алматыда электр қуатының өтемақысы үшін әлеуметтік көмекті қалай алуға болады?

Алматы әкімі әлеуметтік осал азаматтардың 8 санатына, ҰОС ардагерлері мен оған теңестірілген тұлғаларға, 1-2 топ мүгедектеріне, көпбалалы аналарға, зейнеткерлерге электр энергиясы үшін коммуналдық төлем бойынша қосымша әлеуметтік қолдау көрсетуді жоспарлап отыр. Бұл шаралар 1 наурыздан бастап тұрғын үйге электр қуатының 505,78 теңгеге дейінгі өсуіне байланысты қабылданды.

Өтемақы мөлшерін 0,75 АЕК немесе 2769 теңге көбейту жоспарлануда. Оны рәсімдеу үшін халықтың әлеуметтік осал топтары санатындағы адамдар аудандық жұмыспен қамту және әлеуметтік бағдарламаларға немесе әлеуметтік қызметтерге жүгінуі керек.

Мүмкіндігі шектеулі жандар egov.kz электрондық үкімет порталы арқылы өтініш бере алады. "Әлеуметтік қауіпсіздік" бөліміндегі "Отбасыларға көмек" бөліміне өту керек, содан кейін "Жергілікті өкілді органға мұқтаж азаматтардың жеке санаттарына әлеуметтік көмек тағайындау" қызметін таңдау керек. Бұл мемлекеттік қызметті көрсету мерзімі кемінде 6 жұмыс күні болады.

Өтініштер мен шешім қабылдағаннан кейін төлем арыз берушінің екінші деңгейдегі банктердегі шотына түседі.

Баспананы жалға алып отырған тұрғындарға өтемақы төлене ме?

Брифинг барысында журналистер мамандарға "Коммуналдық қызмет бағасының өсуіне байланысты тұрғын үйді жалға алып отырған тұрғындар өтемақы ала ма?" деген сауал қойды.

"Өтемақы Алматы қаласында тұратын, Алматы қаласында тіркелген және тұрақты тұрғылықты жері бар, әлеуметтік осал азаматтардың сегіз санатының біріне жататын азаматтарға беріледі. Жеке баспанасы бар-жоғы маңызды емес.

Мысалы, егер отбасы мүгедек бала тәрбиелеп, пәтер жалдап тұрса, олар да өтемақы алуға өтініш бере алады. Өтемақы төленеді және түбіртекте көрсетілмейді. Өтемақы халықтың әлеуметтік осал тобына жататын әр азаматтың шотына аударылады", - деп атап өтті Бауыржан Жаубасов