Қазақстандықтардың мобильді аударымдарын тексеру қашан басталады: Қаржы министрлігі өкілі жауап берді

Қаржы вице-министрі Ержан Біржанов сенат кулуарында қазақстандықтардың мобильді аударымдары қашан тексеріле бастайтынын айтып берді, деп хабарлайды KAZ.NUR.KZ.

Маңызды тұстар

Бұл мәтін автоматты түрде ЖИ көмегімен жазылған және редактор тексермеген, сондықтан фактологиялық және грамматикалық қателер болуы мүмкін. Толығырақ жарияланымда.

• Қаржы вице-министрі Ержан Біржановтың айтуынша, жеке тұлғалар мен жеке кәсіпкерлерге мобильді аударымдарды тексеру бойынша нұсқама берілмейді, барлық бақылау шараларын екінші деңгейлі банктер жүргізеді.
• Банктер мобильді аударымдардың белгіленген критерийлерге сәйкестігін тексеріп, бұзушылықтар анықталған жағдайда ақпаратты мемлекеттік кірістер органдарына жібереді.
• Декларацияда көрсетілген мәліметтер мен мобильді аударымдардың жалпы сомасы арасында сәйкессіздік анықталса, салық есебіне қою, декларацияға енгізу және салық төлеу сияқты шаралар қолданылуы мүмкін.

"Мобильді аударымдарды тексеруге қатысты бірнеше рет айтқан болатынмын: жеке тұлғаларға немесе жеке кәсіпкерлерге тексеріс жүргізіп, оларға тексеріс шаралары бойынша нұсқама тапсыратын ешқандай жоспарымыз жоқ. Барлық бақылау шарасын екінші деңгейлі банктер бекітіп жүргізеді.

Яғни, банк бұйрыққа сәйкес аударымдардың белгіленген критерийлерге сай келетін-келмейтінін тексереді (мобильді аударымдар лимиттерінің асып кетуі туралы айтылған сөз – авт. ескертпесі). Егер бұл критерийлер бұзылса, банк аталған тұлғалар туралы ақпаратты мемлекеттік кірістер органдарына жібереді. Бұл күнтізбелік жылдың соңында болады.

Қазіргі уақытта декларация тапсыру кезеңі жүріп жатыр. Осыдан кейін біз оларды өңдеп, жүйеге енгіземіз және экспресс-бақылау жүргіземіз. Банктерден мәліметтерді алғаннан кейін, критерийлерде сәйкессіздік анықталса, алдымен камералдық бақылау органдарына хабарлама жібереміз. Бұл қашықтан бақылау", - деп түсіндірді Ержан Біржанов.

Қаржы вице-министрі қазақстандықтардың декларацияда көрсетілген мәліметтер мен мобильді аударымдардың жалпы сомасы арасында сәйкессіздік анықталған жағдайда қандай әрекеттер жасау керегін де айтып берді.

"Мысалы біз сізге белгілі бір критерийлер бар екенін айтамыз, сіз осындай әрекеттер жасауыңыз керек: біріншіден, егер адам тіркелмеген болса, оны салық есебіне қою қажет болуы мүмкін. Екіншіден, егер оның айналымы үлкен болса және ол оны декларацияда көрсетпесе, оны декларацияға енгізу керек. Үшіншіден, салық төлеу қажет болады. Біз онлайн форматта диалог жүргіземіз", - деп қосты Біржанов.

Қазақстандағы мобильді аударымдар

2024 жылдың 1 қаңтарынан бастап Қазақстанда мобильді ақша аударымдарын тексеру басталды. Алайда бұл тексерістер тек кәсіпкерлік қызметінен түсетін табыстарын жасыру үшін аударымдарды пайдаланатын адамдарға қатысты болады, ал қарапайым азаматтарға алаңдаудың қажеті жоқ.

Бұл жағдайға байланысты кейбір жосықсыз сатушылар қолма-қол ақшамен төлем жасауды талап етіп, қолма-қол ақшасыз төлемдерді қабылдаудан бас тарта бастаған. Мемлекеттік кірістер комитеті мұндай әрекеттер заңсыз екенін мәлімдеді.