Кей дәрілер айтарлықтай қымбаттаған: Қазақстанда дәрі-дәрмек бағасы өсті

Қаңтардағы жағдай бойынша Қазақстанда фармацевтикалық өнімдер орташа есеппен 8,6%-ға қымбаттады. Әсіресе "Корвалол", "Канефрон N" мен "Ацикловир" бағасы көтерілген. Дәрі нарығы туралы толығырақ KAZ.NUR.KZ-тен оқыңыз.

Қаңтар айының қорытындысы бойынша Қазақстанда ай сайынғы баға өсімі 1,1%-ға жетіп, жылдық инфляция 8,9%-ға дейін үдей түсті. Азық-түлік, азық-түлікке жатпайтын тауарлар мен қызметтерден бөлек, кейбір дәрі-дәрмектің де бағасы өсті.

EnergyProm порталы атап өткендей, бір жыл ішінде Қазақстанда фармацевтикалық өнімдер орта есеппен 8,6%-ға қымбаттады. Баға ең көп өскен өңір – Қарағанды облысы (14%-ға). Одан кейін Астана (10,9%-ға) мен Абай облысында (10,4%-ға) ең жоғары өсім байқалып отыр.

Бағаның ең аз өсімі Маңғыстау (6,3%-ға) және Ақмола (5%-ға) облыстарында, сондай-ақ Жетісу облысында (4,9%-ға) тіркеліп отыр. Алматыда баға бір жылда 7,9%-ға, ал Шымкентте 8,2%-ға өсті.

Жекелеген өнімдердің ішінде "Корвалол" (30,7%-ға), "Канефрон N" (27,9%-ға), "Ацикловир" (18%-ға), ацетилсалицил қышқылы (16,8%-ға) және "Мультитабс Classic" (15%-ға) поливитаминдері айтарылқтай қымбаттаған.

Сондай-ақ йод (9,3%-ға), белсендірілген көмір (7,9%-ға) және парацетамол (7,6%-ға) сияқты кеңінен таралған дәрілік заттардың да қымбаттауы байқалды. Айта кетерлігі, бұл дәрі-дәрмектің барлығы өткен жылы да айтарлықтай қымбаттаған.

Ал "Эссенциале форте Н" бағасы жыл бойы өзгерген жоқ, "Аквалор Форте" спрейінің бағасы аздап түскен (0,3%-ға).

Дәрі-дәрмек бағасының көтерілу себептерінің бірі Қазақстанның осы саладағы импортқа тәуелділігі болуы мүмкін. Мәселен, 2024 жылдың қаңтар-қараша айлары аралығында Қазақстанға құны 1,5 миллиард доллар болатын 30 мың тонна дәрі-дәрмек импортталды.

Осылайша провитаминдердің, витаминдердің және олардың туындыларының отандық өндірісі ішкі нарықтың 1,7%-ын, ал антибиотиктер өндірісі – 20,3%-ын ғана алады. Қалған дәрілер Қазақстанға сырттан әкелінеді, яғни олардың құнына маркетинг, логистика және басқа да шығындар да әсер етеді.

Мәтіннен қате тапсаңыз, бізге жазыңыз