Қазақстанда "Орда Аймақ" жаңа ипотекалық бағдарламасы ашылады

2025 жылғы 7 сәуірден бастап Қазақстанда аймақтарға арналған "Орда Аймақ" ипотекалық бағдарламасы іске қосылады. Бұл туралы KAZ.NUR.KZ "Қазақстан тұрғын үй компаниясының" баспасөз қызметіне сілтеме жасап хабарлайды.

Компания баспасөз қызметінің хабарлауынша, жаңа ипотекалық бағдарлама "Қазақстан тұрғын компаниясы" кепілдігімен құрылысқа үлестік қатысу туралы шарт бойынша салынып жатқан тұрғын үйді сатып алуға мүмкіндік береді.

"Бұл Қазақстан тұрғын үй компаниясы кепілдігімен үлескердің инвестициялары қорғалатынын білдіреді: құрылыс аяқталмаған немесе құрылыс салушы банкрот болған жағдайда, ҚТК үй құрылысының аяқталуына кепілдік береді", - делінген баспасөз хабарламасында.

Өтінімдер Отбасы банкінің уәкілетті агенттері арқылы қабылданады. 21 жастан асқан Қазақстанның кез келген азаматы қарыз алушы бола алады.

"Орда Аймақ" бағдарламасында Отбасы банкте депозиттің болуы және қарыз алушыда тұрғын үйдің болуы бойынша шектеу жоқ.

Бағдарламаның негізгі артықшылықтары:

• 15,9 пайыз мөлшерінде белгіленген сыйақы мөлшерлемесі, ЖТСМ 17,26 пайыздан 22,81 пайызға дейін.
• бастапқы жарна 20 пайыздан бастап.
• қарыз сомасы 1 млн теңгеден 75 млн теңгеге дейін.
• қарыз мерзімі 12 айдан 240 айға дейін.
• салынып жатқан тұрғын үйдің бағасы дайын тұрғын үйге қарағанда төмен.

Салынып жатқан құрылыс объектілерінің сипаттамасымен, сондай-ақ сату бөлімшелері мен консультанттардың байланыстарымен ҚТК тұрғын үй порталында orda.homeportal.kz-те танысуға болады.