"Екі триллион теңге бөлінген жоқ": су ресурстары мен ирригация министрлігі бөлінген қаржыға қатысты пікір білдірді
Опубликовано:
Су ресурстары мен ирригация министрлігіне су ресурстары жүйесін дамытуға 2 триллион теңге бөлінбеген. Бұл туралы ведомствоның баспасөз қызметі мәлімдеді.
"Екі триллион жайлы айтсақ, оған республика аумағындағы барлық су ресурстарының жүйесін қалыпқа келтіру бойынша мамандардың есептері кіреді. Су нысандарының тозғандығы да соның ішінде. Мұндай соманың бөлінуі жайлы сөз болған жоқ", - деді баспасөз өкілдері.
Бұған дейін БАҚ беттерінде министрдің Қазақстандағы су саласының дамуына қанша қаржы қажет екені жайлы айтқаны жарияланған еді.
Ведомствоның мәліметіне сәйкес, министрлікке бөлінген бюджет 110 миллиард теңгені құрады. Оның 25 миллиарды су шаруашылығы нысандарын жақсарту үшін әкімдіктерге берілмек.
Қалған қаржы су шаруашылығы нысандарының құрылысы мен жөндеу жұмыстарына, тұрғындарды ауыз сумен қамтамасыз ету үшін салынатын су құбырларының құрылысына, ирригациялық жұмыстарға, су саласы қызметкерлерінің еңбекақысына жұмсалады.
Мәтіннен қате тапсаңыз, бізге жазыңыз