Қазақстандағы екінші АЭС: Үлкен ауылының тұрғындары станция салынатынын қалай қабылдады

Алматы облысы Жамбыл ауданы Үлкен ауылында екінші атом электр станциясының құрылыс ауданын талқылауға арналған жария тыңдау өтті, деп хабарлайды Атом энергиясы жөніндегі агенттікке сілтеме жасаған KAZ.NUR.KZ.

Агенттіктің хабарлауынша, жария тыңдауға ауыл тұрғындары, қоғам қайраткерлері, мәслихат, Қазақстан Атом энергиясы жөніндегі агенттігі, "Қазақстандық атом электр станциялары" ЖШС, "Ядролық физика институтының" өкілдері қатысты.

Жиында екінші атом электр станциясының ықтимал орналасу орындарына талдау жүргізілді.

Бұл талдау Қазақстанның атом саласын дамыту мәселелері жөніндегі ведомствоаралық комиссияның отырысында қаралды, оның қорытындысы бойынша екінші АЭС салу үшін аудан ретінде Алматы облысының Жамбыл ауданын айқындау ұсынылды.

Мамандар тұрғындардың сұрақтарына жауап беріп, заманауи реакторлық технологиялар халықаралық стандарттарға сәйкес келетінін және көп деңгейлі қорғаныс жүйелерімен жабдықталғанын атап өтті.

"Қазақстанда 3+ буын реакторлары пайдаланылатын болады, онда қауіпсіздік көп деңгейлі резервтеу, пассивті және белсенді қорғау жүйелерін біріктіру қағидаты бойынша іске асырылады. Қазіргі заманғы реакторларды әлемдік қоғамдастық экологиялық және қауіпсіз деп таныды", - деп атап өтті Қазақстан Атом энергиясы жөніндегі агенттігі Ядролық энергетика департаментінің директоры Гүлмира Мұрсалова.

"Екінші АЭС құрылысы жергілікті өндірісті елеулі дамытуды қамтамасыз етіп, өңірдегі шағын және орта бизнестің дамуы үшін жағдай жасайды. Дүниежүзілік тәжірибе көрсеткендей, АЭС-тегі бір жұмыс орны экономиканың аралас салаларында 10 жаңа жұмыс орнын құруға ықпал етеді", – деп атап өтті Қазақстан Атом энергиясы жөніндегі агенттігінің Қазақстандық қамту департаментінің директоры Данияр Жансейтов.

Агенттік мәліметінше, жергілікті тұрғындар бұл жобаға "қолдау білдірген". Тыңдау қорытындысы Алматы облысы мәслихатының қарауына жіберіледі.

"Біз екінші АЭС құрылысын қолдаймыз, өйткені ол тұрғындарымызға жаңа мүмкіндіктер ашып, жұмыс орындарын құрып, энергиямен қамтамасыз ету мәселелерін шешуге көмектеседі. Жоба инфрақұрылымды дамуға үлес қосып, болашақ ұрпаққа тұрақтылық қамтамасыз етеді", – деп атап өтті Жамбыл аудандық Қоғамдық кеңес төрағасы Алиев Бағдат Байшалұлы.

Мәтіннен қате тапсаңыз, бізге жазыңыз