Елімізде мұнай-газ, электр және жылу энергетикасы саласындағы стратегиялық нысандарды қорғау күшейтіледі

Энергетика министрі Ерлан Ақкенженов Қазақстанның энергетикалық инфрақұрылымының қауіпсіздігін қамтамасыз ету бойынша кеңес өткізді, деп хабарлайды KAZ.NUR.KZ ведомствоның баспасөз қызметіне сілтеме жасап.

Министрліктің баспасөз қызметінің мәліметінше, энергетика министрі Ерлан Ақкенженов отын-энергетика кешенінің басшыларымен кеңес өткізіп, оның барысында еліміздің тыныс-тіршілігін қамтамасыз ету нысандары мен энергетикалық инфрақұрылымының қауіпсіздігін қамтамасыз ету шараларын талқылады.

Ведомство басшысы ұлттық активтерді қорғаудың маңыздылығын атап өтіп, мұнай-газ секторындағы, сондай-ақ электр және жылу энергетикасы саласындағы стратегиялық нысандарды қорғау бойынша кешенді жұмысты күшейтуді тапсырды.

"ҚазМұнайГаз" ҰК" АҚ, "QazaqGaz" ҰК" АҚ, "KEGOC" АҚ, "PSA" ЖШС және "Самұрық-Энерго" АҚ өкілдері қауіпсіздікті қамтамасыз ету бойынша атқарылып жатқан шаралар мен жоспарлар туралы баяндады.

Талқылау қорытындысы бойынша Ерлан Ақкенженов жауапты вице-министрлерге еліміздің энергетикалық секторының кепілді тұрақтылығын сақтау мақсатында қауіпсіздік мәселелерін жедел пысықтау үшін ұлттық компаниялармен және энергия кәсіпорындарымен тығыз іс-қимылды қамтамасыз етудің маңыздылығын атап өтті.

Мәтіннен қате тапсаңыз, бізге жазыңыз