Министр Шарлапаев утильалымды алып тастау талап етілген петиция туралы пікір білдірді

Сенат кулуарында өнеркәсіп және құрылыс министрі Қазақстанда утильалымды алып тастау туралы идеяны "делдалдар" алға тартып жатқанын айтты. Оның сөзінше, бұл мәселе қазір қарастырылып жатқан жоқ. Бұл туралы KAZ.NUR.KZ хабарлайды.

"Бұл талқыға қатысты пікір білдіргім келеді – бұл пікірталасты туғызған адамдар, әдетте, қайта сатумен айналысады. Мен мұны негізсіз айтып отырған жоқпын. 17 мамырда қайта өңдеу ақысын алып тастауды талап еткен барлық өкілмен кездескен едім.

Үлкен дискуссия өткіздік, оған 12-ге жуық парламент мүшесі қатысты. Біз мемлекеттік саясаттағы өзгерістерге қатысты пікірімізді бөлістік. Бірақ көбіне бұл адамдар шетелден көлік сатып алып, елге әкеліп, осында сату арқылы ақша табатыны анықталды", - деді министр Қанат Шарлапаев.

Ол қайта сату ел экономикасына пайда әкелмейтінін айтты.

"Мен өндіріс экономикасы мен өнеркәсіп секторын дамытуға үлес қосуды басқаша түсінемін – меніңше, өз табысын мемлекеттің индустриялық дамуынан сәл жоғары қоятын адамдардың сөзіне еліктемеу керек", - деп қосты өнеркәсіп және құрылыс министрі.

Қазақстанда утильалымды алып тастау туралы петицияға 49 мыңға жуық адам қол қойған болатын. Қанат Шарлапаев бұл ақпаратқа қатысты елде шамамен осыншама адам өнеркәсіпте жұмыс істеп, көлік өндірумен айналысатынын айтты.

"Бұл ретте бірінің қалауы өзгелердің жұмыссыз қалуына себеп болса, бірінің пайдасына орай екіншісін жоюға болмайды. Мұндай мәселелерге әділ көзқараспен қарау керек. Меніңше, бұл бұрыс көзқарас.

Бұл ретте мен бір топтың мүддесі экономикалық жағдайға емес, аталған зауыттарда жұмыс істейтіндердің ертең нан сатып алу мүмкіндігіне тікелей әсер ететінін байқап отырмын. Тағы қайталап айтамын – біз қазір утильалым мәселесін қайта қарастырып жатқан жоқпыз", - деп түйіндеді министр.

Биыл қаңтарда парламент мүшелері осы мәселе бойынша пікір білдірген. Олардың айтуынша, еліміздегі автопарктер ескіре бастады – өзге елдерден автокөліктерді әкелу кезінде кедендік баж салығы жоғары болғандықтан, сатып алушы үшін шетелдік көліктердің түпкілікті бағасы да жоғары. Сол себепті депутаттар утильалым және көлікті бастапқы тіркеу бағасын төмендетуді ұсынды.

Мәтіннен қате тапсаңыз, бізге жазыңыз