"53,3 млрд теңгеге сәйкессіздік": кірістер комитеті блогерлерге жіберілген хабарламаларға қатысты түсінік берді

Мемлекттік кірістер комитетінің өкілдері салық міндеттемелеріне қатысты блогерлерге жіберілген хабарламаларға байланысты пікір білдірді. Бұл туралы KAZ.NUR.KZ ведомствоға сілтеме жасап хабарлайды.

"Мемлекеттік кіріс органдары салық міндеттемелерін толық орындау мақсатында блогерлерді қоса алғанда, жеке тұлғаларға салықтық әкімшілендіруді тұрақты негізде жүргізеді.

Бақылау шараларын жүргізу кезінде мемлекеттік кіріс органдары уәкілетті мемлекеттік органдармен, ұйымдармен және өзге де тұлғалармен өзара іс-қимылды жүзеге асырады.

Түрлі ақпарат көздерінен алынған деректерді ұсынылған салық декларацияларының мәліметтерімен салыстыру қорытындысы бойынша 594 тұлғаға қатысты 53,3 млрд теңгеге сәйкессіздік анықталды, нәтижесінде ағымдағы жылдың 13-14 ақпан аралығында "кірістерді төмендету" бұзушылықтары бойынша камералдық бақылау хабарламалары жіберілді.

Хабарламаны орындау мақсатында дербес есептелген салықтарды төлей отырып, қосымша салық есептілігі тапсырылады немесе хабарламамен келіспеген жағдайда түсіндірмені ұсыну қажет", - делінген Мемлекеттік кірістер комиттің Telegram-арнасында жарияланған хабарламада.

Хабарламаның орындалу мерзімі 30 жұмыс күнін құрайды.

"Сонымен қатар табыс алу кезінде салықтарды төлеу қажеттілігіне, оның ішінде әртүрлі интернет-ресурстарында онлайн-жарнамаларды жариялауға (ақпараттық өнімдерді жылжыту немесе сату, әртүрлі оқыту курстарын сату, ұтыс ойындарын өткізу және т.б.) назар аударамыз.

Көрсетілген міндеттемелер Қазақстан Республикасының Конституциясында және Салық кодексінде белгіленген", - деп түсіндірді ведомство өкілдері.

Мәтіннен қате тапсаңыз, бізге жазыңыз