RU

Тоқаев 2021 жылдың алғашқы күнінде немен айналысып жатқанын көрсетті (фото)

Қасым-Жомарт Тоқаев
Қасым-Жомарт Тоқаев. Фото: instagram.com/tokayev_online

Қазақстан президенті Қасым-Жомарт Тоқаев 2021 жылдың алғашқы күнінде немен айналысып жатқанын көрсетті. Мемлекет басшысының Instagram парақшасында суреттер жарияланды.

"Жаңа жылдың бірінші күні", - деп жазған президент.

Қасым-Жомарт Тоқаев көшеде суретке түскен. Желіде жарияланған фотосуретке қарағанда, мемлекет басшысы жаңа жылдың алғашқы күнінде таза ауамен тыныстауды жөн көрген.

Оқырмандар президентті Жаңа жыл мерекесімен құттықтаған.

"Еліміз аман, жұртымыз тыныш болғай", "Денсаулығыңыз мықты болып, өмір жасыңыз ұзақ болсын!", "Жаңа жылыңызбен!", - деп жазуда көпшілік.

Еске сала кетсек, мемлекет басшысы Қазақстан халқын Жаңа жылмен құттықтады.

"Қадірлі отандастар! Санаулы минуттан соң 2020 жыл тарих қойнауына енеді. Осы мерейлі мезетте ескі жылмен қоштасып, болашаққа бағдар түземіз. Бұл – бәріміз жайдары көңілмен бір-бірімізге ақ тілек арнайтын айрықша сәт.

Өтіп бара жатқан жыл күллі әлем жұртшылығының есінде қалатын ерекше жыл болды. Дүние жүзі бұрын-соңды болмаған алапат індетпен бетпе-бет келді.  Біздің халқымызға да оның зардабы тиді. Осындай қиын кезеңде тұтас ұлт болып бірлігіміздің қадір-қасиетін жете сезіндік. Дертке шалдыққан әрбір адамның тезірек сауығып кетуін тіледік. Бірақ, індет адам талғамайды. Пандемияның салдарынан көптеген азаматтарымыздан айырылып қалдық. Олардың ішінде елімізді өркендетуге зор үлес қосқан танымал тұлғалар да бар.  Өмірден өткен адамдардың имандары саламат болсын! Енді мұндай қасірет қайталанбасын. Бұл үшін қолдан келгеннің бәрін жасаймыз. Әр азамат мемлекеттің қамқорлығында болады. Алдағы жылдан бастап коронавирусқа қарсы тегін вакцина егуді бастаймыз. Оны азаматтардың қалауымен, ерікті түрде жүргіземіз.

Осы күрделі кезеңде халқымыз береке-бірлігі мен ынтымағын арттыра түсті. Отандастарымыз бір-біріне қол ұшын беріп, жанашырлық танытты. Бұл – шын мәнінде, ізгілік пен қайырымдылықтың үлгісі.  Ең бастысы, біз бәріміз бірге болдық. Мемлекет тарапынан миллиондаған адамға қолдау жасалды. Біз қоғамның игілігі үшін қажырлы еңбек етіп жүрген азаматтардың жұмысын бағалай білдік. Дәрігерлер, мұғалімдер, тәртіп сақшылары, еріктілердің ерен ерлігіне куә болдық. Бұл азаматтар – бейбіт күннің нағыз батырлары. Оларға халқымыз шексіз риза", - деді президент.

Мақаланың түпнұсқасы: https://kaz.nur.kz/politics/1892010-tokaev-2021-zyldy-algasky-kninde-nemen-ajnalysyp-zatkanyn-krsetti-foto/