Алматыда парламент сайлауы қалай өтіп жатыр (фото)
Опубликовано:
![жас сайлаушы жас сайлаушы](https://cdn.nur.kz/images/1120x630/fbb03703eda1c23b.jpeg)
Бүгін Қазақстанда көптен күткен Парламент сайлауы өтіп жатыр. Алматыда сайлаудың алғашқы сағаттары дауыс берушілердің белсенді қатысуымен ерекшеленді. Сайлаушылардың арасында бірінші рет дауыс беруге келген азамат та, жасы 83-ке келген қария да бар деп жазады KAZ.NUR.KZ тілшісі.
Портал тілшісі байқағандай, оңтүстік астанадағы № 141 сайлау учаскесінде таңертеңнен бастап адам қарасы үзілер емес. Сайлаушылар дауысберу үшін кезекке тұруда.
![Сайлау учаскесіндегі кезек күткен дауыс берушілер Сайлау учаскесіндегі кезек күткен дауыс берушілер](https://cdn.nur.kz/images/1120/c7b92d20347ba911.jpeg)
Мәжіліс пен мәслихат депутаттарының кезекті сайлауы пандемия жағдайында өтіп жатыр. Сайлау учаскелері барлық санитарлық талаптарға сай қызмет көрсетуде. Кіре берісте сайлаушылардың дене қызуын тексереді.
![Сайлаудағы сақтық шаралары Сайлаудағы сақтық шаралары](https://cdn.nur.kz/images/1120/eed9a1573317cb53.jpeg)
Антисептик тұр. Учаскеге маскасыз келгендерге бетперде қарастырылған. Сондай-ақ комиссия мүшелері сайлаушылар арасындағы арақашықтық сақталуын бақылауға алған.
![Алматыдағы сайлау учаскесі Алматыдағы сайлау учаскесі](https://cdn.nur.kz/images/1120/d7c47e05b534ec31.jpeg)
Келушілер кезекпен бюллетень алып, ортадағы жәшікке тастауда. Төр жақта екі қатар орындықтарға бақылаушылар жайғасқан.
Сайлау үчаскесіне қол ұстасқан ерлі-зайыптылар, жастармен қатар жасы үлкен қарттар да қатардан қалыспай ат басын бұрған.
Жасы 83-ке келген қарт әже де қызымен бірге дауыс беріп кетті.
![Алматы тұрғындары сайлаудан қайтып барады Алматы тұрғындары сайлаудан қайтып барады](https://cdn.nur.kz/images/1120/0623dd12a171024e.jpeg)
Сайлаушылардың қатарында енді ғана кәмелет жасына толған алматылық Айбек Тоқтасын да бар. Ол бүгін алғаш рет сайлауға қатысып, таңдау жасады. Сайлау комиссиясы оған арнайы әзірлеген сыйын ұсынды.
![жас сайлаушы жас сайлаушы](https://cdn.nur.kz/images/1120/fbb03703eda1c23b.jpeg)
"Мен бүгін бірінші рет дауыс беріп тұрмын. Таңдауымды айтпай-ақ қояйын. Бірақ бюллетеннен партия атауын тауып, белгілегенде өзімді еліміздің болашағы үшін маңызды шешім қабылдап жатқандай сезіндім", - дейді Айбек.
Түске дейін сайлау жәшігінің жартысы толуға шақ қалды.
Айта кетсек, Қазақстан тәуелсіздік алғалы бері елде жеті рет парламент сайланды. Парламенттің төменгі палатасы – мәжіліс сайлауына елде ресми тіркелген алты партия қатысып жатыр.
Мәжілістің 107 депутатының 98-ін партиялық тізім бойынша төте дауыс беру жолымен сайлаушылар сайласа, тоғызын Қазақстан халқы ассамблеясы іріктейді.
Мақаланың түпнұсқасы: https://kaz.nur.kz/politics/1892961-almatyda-parlament-sajlauy-kalaj-tip-zatyr-foto/