RU

Елорда әкімі Көлгінов Нұрсұлтан Назарбаевтың қабылдауында болды

Назарбаев Көлігнов
Фото: elbasy.kz

Қазақстанның Тұңғыш президенті Нұр-Сұлтан қаласының әкімі Алтай Көлгіновті қабылдады. Кездесуде елорда әкімі Нұсұлтан Әбішұлына қала құрылысындағы алдағы жоспарлар мен санитарлық-эпидемиологиялық жағдайды тұрақтандыру бойынша қабылданған шаралар туралы баяндады деп хабарлайды Елбасы сайты.

Көлгіновтің мәліметінше, 2020 жылы елорданы дамыту және тұрғындарға қолайлы жағдай жасау бойынша маңызды жобаларды іске асыру үшін 1 триллион теңгеден астам инвестиция тартылған.

Әңгіме барысында білім беру, денсаулық сақтау, өнеркәсіп, тұрғын үй құрылысы және инфрақұрылымды дамыту салаларындағы жобаларды іске асыру мәселелеріне ерекше мән берілді.

Сонымен қатар Нұр-Сұлтан қаласының әкімі пандемия жағдайында елорданың шағын және орта бизнес өкілдерін қолдау шаралары туралы айтып берді.

Естеріңізге сала кетсек, бұған дейін елордада заманауи талаптарға сай теңдесіз емхана ашылатыны туралы хабарлаған едік. Медициналық мекеме әдеттегі функционалдық міндеттеріне қоса, пандемия кезеңінің барлық талаптарына сәйкес келеді.

Бұл жөнінде Нұр-Сұлтан қаласының әкімі Алтай Көлгінов өзінің Instagram парақшасында мәлімдеді.

Оның жазуынша, емханада аймақтар "лас" және "таза" деп бөлінген; ішке айдау желдеткіш жүйесі, телемедицинаға арналған конференц-зал орнатылған.

Жаңғыртылған емхана Есіл ауданында орналасқан.

"Бұған дейін ауданда тек бір - №9 емхана болатын. Басқа медициналық ұйымдардың болмауына байланысты №9 емханаға жүктеме шамадан тыс артылып келді. Емхана толығымен жеке инвестициялар есебінен салынды. Қала тұрғындары үшін мемлекеттік тапсырысты орындаймыз", - дейді елорда әкімі.

Мақаланың түпнұсқасы: https://kaz.nur.kz/politics/1895240-elorda-kimi-klginov-nrsltan-nazarbaevty-kabyldauynda-boldy/