RU

Тоқаев Жоғарғы сот төрағасын қабылдады

Фото
Фото: Ақорда

Мемлекет басшысы Қасым-Жомарт Тоқаев Жоғарғы сот төрағасы Жақып Асановты қабылдады деп хабарлайды Ақорда.

Президентке сот жүйесіне әкімшілік әділет механизмін енгізуге дайындық жұмыстарының барысы жайында баяндалды.

Жоғарғы сот төрағасы 2021 жылдың 1 шілдесінен бастап Әкімшілік рәсімдік-процессуалдық кодекс қолданысқа енгеннен кейін сот мемлекеттік құрылымдарға қойылатын талаптарды әлемдік әкімшілік әділет жүйесіне сәйкес "мемлекеттік органның кінәлілік презумпциясы" принципімен қарастыра бастайтынын жеткізді.

Жақып Асановтың айтуынша, шетелдік тәжірибе көрсеткендей, әкімшілік әділет жүйесін енгізу мемлекеттік аппараттағы тәртіпті күшейтуге, инвестициялық ахуалды жақсартуға және экономиканың өсуіне ықпал етеді.

Мемлекет басшысы аталған Кодекс күшіне енген күннен бастап соттар жаңартылған алгоритм негізінде, қазақстандық сот төрелігі үшін тың тәсіл бойынша жұмыс істеуге дайын болады деп сенетінін айтты.

Президент азаматтардың және кәсіпкерлердің құқықтары мен мүдделерін қорғау мемлекеттің басты міндеттерінің бірі екенін атап өтті.

Еске сала кетсек, осыған дейін мемлекет басшысы әділет министрі Марат Бекетаевты қабылдаған болатын. Қасым-Жомарт Тоқаевқа әділет министрлігінің өткен жылы атқарған жұмыстарының негізгі қорытындылары жайында баяндалды.

Мақаланың түпнұсқасы: https://kaz.nur.kz/politics/1896917-tokaev-zogargy-sot-tragasyn-kabyldady/