Top.Mail.Ru

Сайт нұсқасы

ru kz

Зектілері

Үлкен Алматы айналма жолы жоспарланған уақыттан 2 жыл ертерек бітуі мүмкін

Опубликовано:

Almaty
Фото: primeminister.kz

Премьер-министр Асқар Мамин 1 шілде күні Алматы қаласына жұмыс сапары аясында Үлкен Алматы айналма автомобиль жолының салыну барысын тексерді деп хабарлайды primeminister.kz.

Үкімет басшысы құрылыс-монтаждау жұмыстарының қарқынын арттыруды және барлық сапа стандарттарын қамтамасыз ете отырып, кестеден 2 жылға ертерек, жұмысты 2022 жылдың соңына дейін аяқтауды тапсырды.

"Үлкен Алматы айналма автомобиль жолының құрылысы Алматы агломерациясын ғана емес, сондай-ақ жалпы елдің транзиттік-көлік әлеуетін дамыту үшін де маңызды", — деді Асқар Мамин.
Үкімет басшысы
Фото: primeminister.kz

Айта кетейік, Үлкен Алматы айналма автомобиль жолы – Қазақстан мен Орталық Азиядағы мемлекеттік-жекешелік әріптестік саласындағы жол құрылысының ірі инфрақұрылымдық жобасы. Құрылыс-монтаж жұмыстарының құны 150 миллиард теңгені құрайды. Жобаны Еуропа қайта құру және даму банкі, Ислам даму банкі, Еуразия даму банкі қаржыландырады.

Концессия шартына 2018 жылы 20 жыл мерзімге қол қойылды.

Концессионер – "Алсим Аларко", "Макйол Иншаат", "СК Экоплант", "Корея Экспрессвэй" секілді Түркия және Оңтүстік Корея компаниялары құрған "Үлкен Алматы айналма автомобиль жолы Инвестициялар және Операциялар" жауапкершілігі шектеулі серіктестігі.

Алматы қаласының төңірегіндегі ұзындығы 66 шақырым және алты жолақты қозғалысты үлкен айналма автомобиль жолы I техникалық санат параметрлеріне сәйкес келетін болады.

Автожол құрылысымен қатар жаңа көпірлер, көлік жол айрықтары мен эстакадалар салу көзделген.

Жобаны іске асыру көлік қызметін көрсету сапасын арттырады, жол қозғалысы қауіпсіздігін қамтамасыз етеді, автомобиль көлігінің қоршаған ортаға теріс әсерін азайтады.

Үлкен Алматы айналма автомобиль жолы пайдалануға берілгеннен кейін барлық транзиттік ағын – тәулігіне шамамен 38 мың автомобиль Алматы қаласын айналып өтетін болады. Бұл ретте Қытай мен Еуропа арасындағы жүк тасымалдау көлемі өседі деп күтілуде.

Құрылыс алаңына шамамен 1600 адам мен 600 бірлік техника жұмылдырылған. Құрылыс аса белсенді жүргізілетін кезде 3 мыңға жуық адамды тарту жоспарланып отыр.

Мақаланың түпнұсқасы: https://kaz.nur.kz/politics/1920550-ulken-almaty-ainalma-zoly-zosparlangan-uaqyttan-2-zyl-erterek-bitui-mumkin/

pixel