RU

Қоғамдық келісім – ел дамуының негізі: Таразда халықаралық конференция өтуде

Конференция
Фото: Жамбыл облысы әкімдігі

Мемлекетіміздің дамуы мен өсіп-өркендеуінің темірқазығына айналған этносаралық татулық пен өзара келісімді сақтау және оны бағалай білу – баршаның мерейлі міндеті.

Таразда өтіп жатқан «Қазіргі кезеңдегі этносаралық келісім: тәжірибе мен алдағы міндеттер» халықаралық ғылыми-практикалық конференцияда бұл туралы жан-жақты айтылды.

Жиынға 200-ден аса этносаралық қатынастар және конфликтология саласындағы Ресей, Украина, Израиль, Болгария, Өзбекстан мемлекеттерінен келген және отандық сарапшылар, Қазақстан Республикасы Парламенті Мәжілісінің депутаттары, Жоғарғы Соттың, Бас прокуратура, Ұлттық экономика, Ішкі істер, Білім және ғылым министрліктерінің, философия, саясаттану және дінтану институттарының өкілдері қатысты.

Конференция
Фото: Жамбыл облысы әкімдігі

Шараның ашылуында облыс әкімі Б. Сапарбаев ҚР Президенті Қасым-Жомарт Тоқаевтың арнайы жолдаған хатын қатысушыларға таныстырды.

Мемлекет басшысының хатында этносаралық келісім – Елбасы Нұрсұлтан Назарбаев негізін қалаған, бүгінде бүкіл қоғамымыздың және әрбір азаматтың міндеті болып табылатын бағыт екендігі, бұл бірегей модель әлемдік қауымдастық деңгейінде лайықты бағаға ие болғандығы айтылған. Мемлекет басшысы ұйымшылдық пен жасампаз еңбектің арқасында тәуелсіздігімізді нығайтып, лайықты беделге ие тұрақты мемлекет құра алғанымызды айрықша атап өтіп, конференция жұмысына сәттілік тілеген.

Бердібек Сапарбаев этносаралық келісімді нығайтудағы аймақтық тәжірибенің маңызды бағыттарына жан-жақты тоқталды.

Конференция
Фото: Жамбыл облысы әкімдігі

Кез-келген елдің күші – оның халқының бірлігінде. Елбасы Нұрсұлтан Әбішұлы:

«Тұрақтылық пен келісім – бұл жылдан-жылға, ұрпақтан-ұрпаққа жүргізіліп отыратын күнделікті жұмыс болуы тиіс», - деп атап өткен болатын.

Жамбыл облысы республикада этностардың көп шоғырланған өңірлердің бірі. 87 ұлт бір шаңырақ астында тату-тәтті өмір сүруде. Олар облыс аумағының 7 ауданындағы 25 елді мекенде тұрады. Әр ауылдың әлеуметтік карталары жасалынды. Негізгі мақсат – халықты толғандыратын, наразылық тудыратын мәселелерді анықтау, олардың шешілуіне көмектесу.

«Өңірдегі этномәдени бірлестіктердің саны тұрақты түрде өсіп келеді. Бүгінгі таңда олардың саны 75-ке жетті»,- деді аймақ басшысы.

Мемлекет басшысы Қасым-Жомарт Тоқаевтың тапсырмасына сәйкес қолға алынған «Бейбітшілік пен келісім» пилоттық жобасы толеранттылықты нығайтуда айрықша маңызға ие болды. Жоба аясында жыл басынан бері 145 елді мекенде кездесулер өтіп, тұрғындарды алаңдататын негізгі мәселелер анықталды. Оларды шешу үшін арнайы "Жол картасы" әзірленді.

Конференция
Фото: Жамбыл облысы әкімдігі

Қазақстан халқы Ассамблеясы төрағасының орынбасары - ҚР Президенті Әкімшілігінің Қазақстан халқы Ассамблеясы хатшылығының меңгерушісі Марат Әзілханов қоғамдық келісімді нығайтудағы Қазақстан халқы Ассамблеясының рөлі туралы баяндады.

ҚР Парламенті Мәжілісінің депутаты Ерлан Саиров «Жаңа геосаяси жағдайларда этносаралық келісімді қамтамасыз етудің маңыздылығы», Ақпарат және қоғамдық даму вице-министрі Болат Тлепов «Жаңа азаматтық бірегейлік – XXI ғасырдағы этносаралық келісімнің формуласы», Ұлттық экономика вице-министрі Әлібек Қуантыров «Қоғамдық тұрақтылықты қамтамасыз етудегі өңірлердің әлеуметтік-экономикалық дамуының рөлі» тақырыптарында ойларын ортаға салды.

Бердібек Сапарбаев
Фото: Жамбыл облысы әкімдігі

Барлық қатысушылар қоғамдық келісім мен саяси тұрақтылық – еліміздің ең жоғары байлығы екендігін, мұндай маңызды құндылықтардың жолында әрбір Қазақстан азаматы аянбай еңбек ету керектігін баса айтты.

Екі күнге жоспарланған конференция жұмысы негізгі тақырып аясындағы төрт секция бөлінісінде жалғасуда. Онда отандық және шетелдік спикерлер баяндама жасауда.

Мақаланың түпнұсқасы: https://kaz.nur.kz/politics/1937099-qogamdyq-kelisim-el-damuynyn-negizi-tarazda-xalyqaralyq-konferenciya-otude/