Министр суперпрезиденттік пен президенттік форманың аражігін түсіндірді

Орталық коммуникациялар қызметіндегі баспасөз мәслихатында Әділет министрі Қанат Мусин суперпрезиденттік пен президенттік форманың аражігін түсіндіріп берді, деп хабарлайды ҚазАқпарат.

"Бұрын президентте аудан әкімдерін тағайындау, оларды лауазымнан босату, шешімдерін өзгерту немесе күшін жою өкілеттігі болды. Бірақ бұл президенттің жұмысы ма? Әрине, жоқ. Суперпрезиденттік форма деген осы. Бүкіл мемлекеттік басқару жүйесін түбіне дейін жетіп, оларды жөндеп отыру – бұл суперпрезиденттік форма.

Қазір президент мұндай өкілеттіктерден арылып жатыр. Оны шешетін облыс әкімі, басқару деңгейінің түрлі өкілдері бар. Сол деңгейде шешілуі тиіс. Суперпрезиденттіктен кетіп, президенттік формаға көшу дегеніміз осы. Бұл бір ғана мысалы", - дейді Қанат Мусин.

Оның айтуынша, "Қазақстан Республикасының президенті туралы" Конституциялық заңға және басқа да бірқатар заңдарға енгізілетін өзгерістерді қазір жұмысшы тобы пысықтап жатыр.

"Соңғы кезеңіне шықтық. Жоспар бойынша сәуірдің соңына дейін заң жобасы мәжіліс қарауына енгізілуі тиіс", - дейді Әділет министрі.

Айта кетейік, мемлекет басшысы наурыз айындағы халыққа жолдауында Қазақстан суперпрезиденттік басқару формасынан күшті парламенті бар президенттік республикаға көшетіндігі туралы айтқан еді.