Ерлан Қошанов: AMANAT партиясының қатарына мемлекетшіл азаматтар келуі керек

Мәжіліс төрағасы Ерлан Қошанов жұмыс сапарымен Маңғыстау облысына барып, Маңғыстау облысының жұртшылығымен кездесті.

Жиында Ерлан Қошанов еліміздегі елеулі оқиға қарсаңында Маңғыстау өңіріне арнайы келгенін айтып, референдумның мән-маңызына тоқталды.

Мәжіліс төрағасы маңғыстаулықтардың президенттің саясаты мен жаңа бастамаларына үнемі қолдау көрсетіп жүргеніне назар аударды.

"Ел алдында тұрған биік мақсаттарға қол жеткізу үшін халқымызға ауызбірлік керек. Ендігі кезекте президентіміздің жанына топтасып, ел өміріне оң өзгеріс әкелетін реформаларды жүзеге асыруға атсалысуға тиіспіз. Осы орайда маңғыстаулық азаматтарымыздың мемлекет басшысына тірек болатынына сенімдіміз", – дейді Ерлан Қошанов.

Мәжіліс төрағасы президент реформаларының басым бағыттарын түсіндіріп, жаңа нормаларға жайлы кеңірек айтып берді.

"Партияларды тіркеу талаптарының төмендеуі – жаңа саяси бірлестіктердің пайда болуына жол ашады. Мұның бәрі елдің саяси өмірін жандандыратыны сөзсіз. Парламенттегі талқылау да қыза түсері анық. Мемлекет басшысының пікірталас көшеде емес, мәжіліс пен мәслихатта болуы керек деген сөзі іс жүзіне асуда. Енді өз күшіне сенген адамның мажоритарлық сайлау жүйесі арқылы депутат болуына мүмкіндігі бар", – дейді палата спикері.

Ерлан Қошанов Конституциялық соттың құрылып, Адам құқықтары жөніндегі уәкілге конституциялық мәртебе берілуі әділдік іздеген азаматтар үшін жаңа мүмкіндіктерге жол ашатынын айтты.

Палата төрағасы Конституциядағы жердің және табиғи ресурстардың иесі халық деген нормаға қатысты өз ойын білдірді.

"Бұл өзгертуді мемлекет басшысы өзі ұсынды. Оның құқықтық мәнінен гөрі, идеологиялық, саяси және моральдік салмағы өте зор. Өйткені, байтақ жеріміздің бір ғана иесі болуы мүмкін. Ол – халық. Осы өзгертумен біз бұл қағиданы тағы да бір шегелеп отырмыз. Бұл норма әр адамның өз туған жеріне деген жауапкершілігін арттыра түседі. Мысалы, Бозжыра шатқалындағы оқиға бәріміздің есімізде. Сол жолы сіздер өз өлкелеріңізге немқұрайлы қарамайтындықтарыңызды көрсеттіңіздер. Бұл – туған жерге деген қамқорлықтың жарқын көрінісі. Алматыдағы Көкжайлау мәселесі де естеріңізде болар. Президент осындай маңызды мәселелер бойынша әрдайым халықтың пікіріне құлақ асып, әрдайым әділ шешім қабылдап отыр", – дейді мәжіліс спикері.

Ерлан Қошанов конституциялық реформа меритократия мен әділдікті орнату үшін қажет екенін атап өтті.

"Азаматтар елдің өміріне араласып, қызметтік және әлеуметтік өрлеуге тең мүмкіндік алуы керек. Саяси өзгерістер еліне адал, қолынан іс келетін, ақыл-ойы ұшқыр әрбір азаматтың жолын ашу үшін қолға алынды. Жалпы алғанда, Президент реформалары елдің басқару моделін түбегейлі өзгертеді", – дефді палата төрағасы.

Палата спикері Маңғыстау өңіріндегі бірқатар мәселелерге тоқталды. Олар – ауыз сумен қамтамасыз ету, жұмыссыздық, жем-шөп тапшылығы және басқа да әлеуметтік жайттар.

Ерлан Қошановтың айтуынша, облыстың ұзақмерзімді әлеуметтік-экономикалық дамуы президентіміздің ерекше назарында. Мемлекет басшысының тапсырмасымен былтыр өңір дамуының 2021-2025 жылдарға арналған Кешенді жоспары қабылданған.

Сөз соңында Ерлан Қошанов облыс жұртшылығына республикалық референдумға белсенді атсалысуға шақырды.

Сонымен қатар палата спикері жұмыс сапары барысында AMANAT партиясының облыстық филиалының жұмысымен танысып, Аналар кеңесінің мүшелерімен кездесті. Онда көп балалы аналар мәселесін талқылап, оларды толғандырып отырған ең өзекті сұрақтарға жауап берді.

Сапар барысында мәжіліс төрағасы Ш.Есенов атындағы Каспий мемлекеттік технологиялар мен инжиниринг университетін аралап, оқытушылармен және студенттермен әңгімелесті.

Сонымен бірге Ерлан Қошанов "Қошқар ата" қалдық қоймасына барып, өңір экологиясын жақсарту бағытында атқарылып жатқан жұмыстармен танысты.

Сапар соңында Total компаниясына барып, мұнай кен орындарындағы жұмыскерлермен сөйлесіп, референдумның мән-маңызын талқылады.

Өз кезегінде Маңғыстау мұнайшылары президенттің саяси реформаларын қолдайтындықтарын жеткізіп, референдумға қатысатындықтарын айтты.