Тоқаев отандық фермерлерді қолдауға қатысты нақты тапсырма берді

Мемлекет басшысы Қасым-Жомарт Тоқаев үкіметтің кеңейтілген отырысында Ауыл шаруашылығы министрлігіне тапсырма берді, деп хабарлайды БОРТ №1 Телеграм-арнасы.

"Менің тапсырмам бойынша Ауыл шаруашылығы министрлігі алдын ала сатып алу тәсілдерін кеңірек қолдана бастады. Биылғы шілдеге дейін әлеуметтік маңызы бар 47 мың тонна азық-түлікке қатысты осындай шарттар жасалды. Дегенмен, мұндай көлемдегі тауар ішкі нарыққа айтарлықтай ықпал етпейтіні анық.

Өнімді ауыл шаруашылығы тауарларын өндірушілерден алдын ала тікелей сатып алу жолдарын айқындау қажет. Мұнымен құзырлы министрліктер айналысуға тиіс.

Ауыл шаруашылығы министрлігі осы тәсілді жетілдіру үшін тиісті қауымдастықтарды және нарық субъектілерін жұмылдыруға тиіс", - деді президент.

Оның айтуынша, тағы бір өзекті мәселе – өнімді сату.

"Өкінішке қарай, еліміздегі өнімнің бәрі бірдей дүкен сөресінен табыла бермейді. Импортпен қатар, ішкі кедергілер де бар.

Ауыл шаруашылығы тауарларын өндірушілердің мәселелері де аз емес. Олар тауардың үздіксіз жеткізілуін, өнім сапасының тұрақты болуын қамтамасыз ете алмайды. Басқа да талаптар бар. Әрине, мұның бәрін біртіндеп ретке келтірген жөн.

Сондықтан, фермерлерге қолдау көрсету тәсілдерін бірлесе әзірлеуді тапсырамын", - деді Қасым-Жомарт Тоқаев.

Президент "шаруа қожалықтарына ірі сауда желілерімен тығыз байланыс орнатуға мүмкіндік берілуі керек" деген пікірде. Оның сөзінше, мұндай мүмкіндік олардың жұмысын жандандырып, салаға инвестиция тартуға жол ашпақ.

"Отандық тауардың сауда орындарына кедергісіз шығарылуын қамтамасыз ету керек. Бұл – өте маңызды мәселе.

Сондай-ақ, өнімге қосылатын бағаны нақты белгілеп, арада жүрген саудагерлер санын азайту қажет. Ол үшін, ең алдымен, жедел түрде тиісті заңнамалық шараларды қабылдауымыз керек. Үкімет "Атамекен" палатасымен бірлесіп, "Қазақстанда жасалған" жалпыұлттық жобасын бастау үшін ұсыныстар әзірлеуге тиіс", - деді мемлекет басшысы.