Тоқаев Қатардың вице-премьерімен кездесті

Опубликовано:

Қасым-Жомарт Тоқаев пен Мұхаммед бен Абдулрахман Әл Тани
Қасым-Жомарт Тоқаев пен Мұхаммед бен Абдулрахман Әл Тани. Фото: Ақорда

Мемлекет басшысы Қасым-Жомарт Тоқаев Қатар премьер-министрінің орынбасары – Сыртқы істер министрі Мұхаммед бен Абдулрахман Әл Таниды қабылдады. Бұл туралы Ақорда ресми сайтында хабарлады.

Кездесуде қазақ-қатар қарым-қатынастарын дамыту перспективалары талқыланған.

Сондай-ақ сауда-экономикалық ынтымақтастықты кеңейтуге, соның ішінде экономиканың негізгі салаларында бірлескен инвестициялық жобаларды іске асыруға ерекше назар аударылған.

Сонымен қатар президент пен Мұхаммед бен Абдулрахман Әл Тани халықаралық ұйымдар аясындағы өзара іс-қимылды қарастырып, өңірлік күн тәртібіндегі өзекті мәселелер жөнінде пікір алмасқан.

Кездесу барысында мемлекет басшысы қыркүйек айында Эр-Риядта өтетін Орталық Азия және Парсы шығанағы елдері сыртқы істер ведомстволары басшыларының диалог алаңының бірінші отырысын құптайтынын жеткізді.

Ал Мұхаммед бен Абдулрахман Әл Тани Қасым-Жомарт Тоқаевқа Қатар әмірінің сәлемін жеткізіп, оның жуық арада Қазақстанға келетінін растады.

Мақаланың түпнұсқасы: https://kaz.nur.kz/politics/1985486-tayau-arada-qatar-amiri-qazaqstanga-kelmek/