"Айналамызда ауқымды соғыс болып жатыр": Тоқаев ең алдымен еліміздің қауіпсіздігін ойлау керектігін мәлімдеді

Мемлекет басшысы Қасым-Жомарт Тоқаев Түркістан облысының жұртшылығымен кездесуде елдің аумақтық тұтастығы мен қауіпсіздігі бәрінен маңызды екенін айтты, деп хабарлайды президенттің баспасөз қызметі Telegram-дағы ресми арнасында.

Мемлекет басшысы әлемдегі жағдайға тоқталды.

"Қазіргі халықаралық ахуал жөнінде қысқаша айта кеткім келеді. Өздеріңіз білесіздер, әлемдегі жағдай әбден шиеленісіп кетті.

Осындай күрделі жағдайда Қазақстан халықаралық ұйымдарда, ең алдымен, Біріккен Ұлттар Ұйымында дауыс беру кезінде бейтарап ұстанымын сақтап отыр. Бұл біздің ұлттық мүддемізге сай келеді.

Жеріміздің бүтіндігі және еліміздің амандығы – біз үшін бәрінен маңызды. Сондықтан, парасаттылық пен сабырлылық танытып, арандатушылардың жетегінде кетпеуіміз керек", – деді президент.

Президент өз сөзінде халқымыздың басты күші – бірлікте екенін баса айтты.

"Халқымыздың ең басты күші – бірлік, парасаттылық және төзімділік. Осы құндылықтардан айырылып қалсақ, елімізге үлкен қауіп төнеді.

Мемлекеттердің территориялық тұтастығы міндетті түрде сақталуы керек. Бұл – негізгі қағидат. Мен мұны халықаралық аренада үнемі ашық және анық айтып жүрмін. Жақында Біріккен Ұлттар Ұйымына барып, ең биік мінберден бұл туралы тағы да мәлімдедім. Бұның бәрі бекер емес.

Айналамызда ауқымды соғыс болып жатыр. Біз осыны ескере отырып, ең алдымен, еліміздің қауіпсіздігін ойлауымыз керек", – дейді Қасым -Жомарт Тоқаев.

Еске сала кетейік, бүгін, 27 қыркүйекте мемлекет басшысы Қасым-Жомарт Тоқаев жұмыс сапарымен Түркістан облысына барды.