ТМД-ға мүше мемлекеттер басшылары кеңесінің кеңейтілген құрамдағы отырысы өтті

Опубликовано:

ТМД-ға мүше мемлекеттер басшылары кеңесінің кеңейтілген құрамдағы отырысы
ТМД-ға мүше мемлекеттер басшылары кеңесінің кеңейтілген құрамдағы отырысы. Фото: Ақорда

Қазақстан президентінің төрағалығымен ТМД-ға мүше мемлекеттер басшылары кеңесінің кеңейтілген құрамдағы отырысы өтті, деп хабарлайды Ақорда.

Жиынға Әзербайжан президенті Ильхам Әлиев, Армения премьер-министрі Никол Пашинян, Беларусь президенті Александр Лукашенко, Қырғызстан президенті Садыр Жапаров, Ресей президенті Владимир Путин, Тәжікстан президенті Эмомоли Рахмон, Түрікменстан президенті Сердар Бердімұхамедов, Өзбекстан президенті Шавкат Мирзиёев, сондай-ақ ТМД Атқарушы комитетінің төрағасы Сергей Лебедев және Ресей Федералдық жиналысы Федерация кеңесінің төрағасы Валентина Матвиенко қатысты.

Президенттің баспасөз қызметінің мәліметінше, отырыста Қасым-Жомарт Тоқаев бүгінгі іс-шара ТМД елдерінің COVID-19 пандемиясынан кейінгі алғашқы толыққанды саммиті екенін атап өткен.

"Шағын құрамда біз ынтымақтастығымызды одан әрі нығайтудың өзекті мәселелері жөнінде жан-жақты пікір алмастық, Тәуелсіз мемлекеттер достастығын дамытудың негізгі басымдықтарын айқындадық. Бұл COVID-19-дан кейінгі ТМД-ның офлайн форматтағы алғашқы толыққанды саммиті екенін атап өткім келеді. Жалпы, астанамызда қайта бас қосуымыз қуанышты жайт", - дейді Қазақстан президенті.

Бұдан кейін мемлекеттер басшылары бірден ресми құжаттарға қол қою рәсіміне көшуге келіскен.

"Қажетті құжаттарға қол қойылып жатқанда біз ТМД Атқарушы хатшысы лауазымын ТМД Бас хатшысы лауазымына өзгерту туралы мәселені шағын форматта талқылағанымызды жариялағым келеді. Аталған мәселеге қатысты мен осындай ұсыныс жасадым. Себебі кеше біз АӨСШК атқарушы хатшысы лауазымын бас хатшы лауазымына өзгерту туралы шешім қабылдадық. Бұған дейін ШЫҰ-ның атқарушы хатшысы да бас хатшы лауазымына өзгертілді. Негізінде, бұл атқарушы орган лауазымының мәртебесін арттыру үшін маңызды", - дейді Қасым-Жомарт Тоқаев.

Қасым-Жомарт Тоқаев отырыста сөз сөйлеуде
Қасым-Жомарт Тоқаев отырыста сөз сөйлеуде. Фото: Ақорда

Президент сөзін қорытындылай келе, өткізілген саммиттің нәтижелі болғанын айтты.

"Құжаттарға қол қою рәсімі аяқталды. Осылайша, біздің отырысымыз нәтижелі болды деп айтуға толық негіз бар. Сонымен қатар құжаттарды қабылдаудан бөлек делегация басшылары, менің ойымша, ТМД шеңберіндегі көпжоспарлы өзара іс-әрекеттің кең ауқымы және халықаралық күн тәртібі жөнінде өте пайдалы пікірталас өткізді.

Осы ретте айтылған маңызды ұсыныстар мен қаралған құжаттар ТМД кеңістігіндегі ынтымақтастықты одан әрі дамытуға және жетілдіруге бағытталады. Бұл ортақ мақсатымызға сай келеді. Сөз соңында ТМД Атқару комитетінің қызметкерлеріне, біздің сарапшыларға, мемлекеттер басшылары кеңесінің отырысын дайындауға және өткізуге тікелей атсалысқан достастықтың барлық органына ризашылығымды білдіремін", – дейді Қасым-Жомарт Тоқаев.

Сонымен қатар жиында ТМД Бас хатшысы Сергей Лебедев, Ресей Федералдық жиналысы Федерация кеңесінің төрайымы Валентина Матвиенко сөз сөйледі.

ТМД мемлекеттері басшылары кеңесінің төрағасы, Қазақстан президенті Қасым-Жомарт Тоқаев Тәуелсіз мемлекеттер достастығының грамотасын мемлекетаралық "Мир" телерадиокомпаниясының төрағасы Радик Батыршинге табыс етті.

Кездесу соңында ТМД-ға мүше мемлекеттер басшылары мәдениет саласындағы ынтымақтастықты дамыту туралы мәлімдемеге қол қойды. Сондай-ақ достастықты одан әрі дамытуға бағытталған бірқатар құжат қабылданды.

Мақаланың түпнұсқасы: https://kaz.nur.kz/politics/1992775-tmd-ga-muse-memleketter-bassylary-kenesinin-keneitilgen-quramdagy-otyrysy-otti/