Тоқаев Жетісу облысындағы екі әулеттің үлкендерін жоғары мемлекеттік наградамен марапаттайтын болды
Жарияланған күні:
![Қасым-Жомарт Тоқаев Қасым-Жомарт Тоқаев](https://cdn.nur.kz/images/1120x630/23232260c07f15ef.jpeg)
Мемлекет басшысы Қасым-Жомарт Тоқаев Жетісу өңірінің жұртшылығымен кездесуде "Мерейлі отбасына" қатысқан екі әулеттің үлкендерін жоғары мемлекеттік наградамен марапаттау туралы шешім шығарды, деп хабарлайды "Борт №1" Telegram арнасы.
"Ертең "Мерейлі отбасы" республикалық байқауы өз мәресіне жетеді. Онда бүкіл халыққа өнеге болатын үлгілі отбасылар марапатталады.
Қазақстанда нақты бір салада еңбек етіп, тұтас әулеттің кәсібіне айналдырған отбасылар аз емес. Мен жақында теледидардан Ұлытауда тұратын Әйтеновтер отбасы туралы бағдарлама көрдім. 9 баласы, 36 немересі, 70 шөбересі, 3 шөпшегі бар шаңырақ, шын мәнінде елге үлгі-өнеге болуға лайық.
Соғыстан кейін мыс қорытатын зауытта еңбек еткен Жақұда марқұмның ұрпақтары әке жолын қуып, осы мамандықты таңдаған. Бұл әулеттің металлургия саласындағы жалпы еңбек өтілі – 442 жыл. Мұны нағыз адал еңбек деуге болады. Қазір шаңырақтың ата кәсібін 10 немересі жалғастырып келеді.
Жетісулық Андастар әулетін де нағыз мерейлі отбасы деуге болады. Арғы бабаларынан мирас болған 700-ден астам жәдігерді сақтап отырған шаңырақты кәдімгі мұражай десек те артық емес. Әулеттің анасы – өңірге танымал этнограф, белгілі қолөнер шебері. Олардың ұрпақтары да ата-анасының жолын жалғап, ғылым жолын таңдаған.
Мен осы екі отбасының үлкендерін жоғары мемлекеттік наградамен марапаттау туралы шешім қабылдадым", – деді президент Жетісу жұртшылығымен кездесуде.
Айта кетейік, бүгін мемлекет басшысы Жетісу облысына жасаған сапары кезінде өңірдің бірнеше тұрғынын орденмен және медальмен марапаттаған болатын.
Мақаланың түпнұсқасы: https://kaz.nur.kz/politics/1993582-toqaev-zetisu-oblysyndagy-eki-aulettin-ulkenderin-zogary-memlekettik-nagradamen-marapattaityn-boldy/