Тоқаев пен Катар әмірі бір-бірін қасиетті Рамазан айының басталуымен құттықтады

Мемлекет басшысы Қасым-Жомарт Тоқаев Катар әмірі шейх Тәмим бен Хамад Әл Тәнимен телефон арқылы сөйлесті, деп хабарлайды Ақорда Telegram-дағы ресми арнасында.

Қазақстан президентінің баспаөз қызметінің хабарлауынша, екі елдің басшылары бір-бірін қасиетті Рамазан айының басталуымен құттықтап, Қазақстан мен Катар халықтарына бақ-береке тілеген.

Сонымен қатар әңгімелесу барысында сауда-экономикалық, инвестициялық және гуманитарлық салалардағы екіжақты ынтымақтастықты одан әрі нығайту перспективалары талқыланған.

Сондай-ақ Катар әмірінің былтыр қазан айында Астанаға жасаған мемлекеттік сапары барысында қол жеткізілген уағдаластықтарды тиімді жүзеге асыру мәселесіне ерекше назар аударылған.

Тараптар екі ел арасындағы өзара сауда-саттық қарқынын сақтауға және қаржы саласындағы инвестициялық жобаларды іске асыруға ниетті екенін растаған.