Ішкі істер министрлігінде бірқатар кадрлық тағайындау болды

Ішкі істер министрі Марат Ахметжанов ведомствоға қарасты әр түрлі департамент бастығының жаңа орынбасарларын тағайындады, деп хабарлайды Polisia.kz ақпараттық медиа порталы.

Сонымен, Ішкі істер министрінің бұйрығымен ақпарат және байланыс департаменті бастығының орынбасары қызметіне Арман Бәкіржанов тағайындалған.

"Полиция полковнигі Бәкіржанов осы салада 20 жылдан астам жұмыс істеп келеді. Алғаш рет қызметін инженер-бағдарламашы ретінде бастаған. Соңғы лауазымы - ІІМ ақпарат және байланыс департаменті ақпаратты техникалық қорғау басқармасының бастығы", - деп жазады медиа портал.

ІІМ тыл департаменті бастығының орынбасары лауазымына полиция полковнигі Рүстем Тұнғышбаев тағайындалған. Ол бұрын Павлодар облысы полиция департаменті бастығының орынбасары қызметін атқарған.

Бұдан бөлек, Алматы қаласы полиция департаменті бастығының орынбасары лауазымына бұрын осы департаменттің ақпараттандыру және байланыс басқармасының бастығы болып қызмет еткен Ольга Агафонова тағайындалған.

Сонымен қатар көліктегі полиция департаменті бастығының орынбасары қызметіне бұрын осы департаменттің көші-қон қызметі басқармасының бастығы қызметін атқарған Мәулен Мақанов тағайындалған.