Тоқаев Жамбыл облысында ауқымды жел электр станциясын салу жөніндегі бастаманы қолдады

Мемлекет басшысы Қытайға мемлекеттік сапары аясындаа басқарма төрағасы Цянь Чжиминьды қабылдады, деп хабарлайды Ақорда Telegram-дағы ресми арнасында.

Қазақстан президентінің баспасөз қызметінің мәліметінше, кездесу барысында жаңартылатын энергия көздері саласындағы жобаларды іске асыру мәселелері талқыланған.

Қасым-Жомарт Тоқаев компанияның Жамбыл облысында қуаты 1 ГВт болатын ауқымды жел электр станциясын салу жөніндегі бастамасын қолдаған.

Сонымен қатар президентке State Power Investment Corporation компаниясының Қазақстанда жел электр станцияларына арналған құрал-жабдық өндірісін іске қосу ниеті туралы мәлімет берілген.

Өз кезегінде Цянь Чжиминь әлеуметтік жауапкершілік аясында оның компаниясы Қазақстанның оңтүстігінде қуаты 200 ГКаллға дейін жететін жылу станциясын салуды жоспарлап отырғанын жеткізген.

Сондай-ақ кездесуде State Power Investment Corporation компаниясының технологиялық және ғылыми-зерттеу тәжірибесі мол екені ескеріліп, "жасыл" сутегі өндірісі саласындағы ынтымақтастық перспективалары қарастырылған.

Айта кетейік, Қытайдың ірі энергетикалық компанияларының қатарына кіретін State Power Investment Corporation Қазақстанның жасыл энергетика саласындағы жобаларына белсенді түрде инвестиция құятын компания.