Тәжікстан президентінің Қазақстанға жұмыс сапары аяқталды (видео)

Президент Қасым-Жомарт Тоқаев елімізде жұмыс сапары аяқталған Тәжікстан Республикасының президенті Эмомали Рахмонды әуежайдан шығарып салды. Бұл туралы Ақорда Telegram-дағы ресми арнасында хабарлады.

"Мемлекет басшысы Қасым-Жомарт Тоқаев еліміздегі жұмыс сапары аяқталған Тәжікстан Республикасының президенті Эмомали Рахмонды әуежайдан шығарып салып, жылы қоштасты", - делінген хабарламада.

Еске сала кетейік, бұған дейін мәдениет күндері аясында мемлекет басшысы Қасым-Жомарт Тоқаевтың шақыруымен 25-26 тамыз күні Тәжікстан президенті Эмомали Рахмон жұмыс сапарымен Астанаға келетіні туралы жазған едік.

Кеше, 25 тамызда жұмыс сапарымен елордаға келген Тәжікстан президенті Эмомали Рахмон мен мемлекет басшысы Қасым-Жомарт Тоқаев шағын және кеңейтілген құрамда келіссөз жүргізген болатын.

Тоқаев Қазақстан мен Тәжікстан арасындағы одақтастық өзара іс-қимыл туралы декларацияның сәтті жүзеге асырылып жатқанын және биыл 6 айда тауар айналымы 500 миллион доллардан асқанын мәлімдеді.

Оған қоса мемлекет басшысы Қазақстанға су мен электр энергиясын жеткізгені үшін Тәжікстан президенті Эмомали Рахмонға алғысын білдірді.

Сондай-ақ бүгін, сенбі күні мемлекет басшысы Қасым-Жомарт Тоқаев пен Тәжікстан президенті Эмомали Рахмон елорданың бас мешітіне барған болатын.

Ақордада Қазақстанның бас мүфтиі Наурызбай қажы Тағанұлы Құран сүрелерін оқып, екі елдің халқына бейбітшілік пен бақ-береке тілегені атап өтілді.

Қос президент Орталық Азиядағы ең үлкен мешіттің сәулетімен танысқан.

Мәтіннен қате тапсаңыз, бізге жазыңыз