Шымкент қаласы мен Ақтөбе облысының әкімдері ауысады деп күтілуде

Бүгін Шымкент қаласының әкімі Мұрат Әйтенов пен Ақтөбе облысының әкімі Ералы Тоғжанов қызметінен босатылады деп күтілуде. Тиісті ақпарат өңірлік мәслихаттардың ресми сайттарында жарияланды.

Ақтөбе облысы мәслихатының ресми сайтында: "Ақтөбе облысы мәслихаттары депутаттарының облыс әкімін тағайындауға келісім беру мәселесі бойынша жиналысы 2023 жылғы 5 қыркүйекте сағат 13.00-де Аққағаз Досжанова атындағы Конференц - Холл ғимаратында өтеді", - делінген.

Сондай-ақ Шымкент қаласы мәслихатының ресми сайтында да қала басшысының ауысуы мүмкін туралы ақпарат шықты.

"Қазақстан Республикасы президентінің 2022 жылғы 8 маусымдағы №912 жарлығымен бекітілген "Облыс аумағында орналасқан мәслихаттар немесе республикалық маңызы бар қалалар және астана мәслихаттары депутаттарының облыс, республикалық маңызы бар қала және астана әкімін лауазымға тағайындауға келісім беру" қағидаларының 5,6-тармақтарына сәйкес Шымкент қаласы мәслихаты депутаттарының жиналысы өтеді.

Күн тәртібі: Шымкент қаласы әкімін тағайындауға келісім беру туралы.

Өтетін уақыты: 2023 жылғы 5 қыркүйекте сағат 15.00-де.

Өтетін орны: Шымкент қаласы, Nursultan Nazarbaev даңғылы, №10 ғимаратының 3 қабатында орналасқан кіші залында", - делінген хабарламада.