"Тарихтағы алғашқы сапар": Тоқаев шақыруын қабыл алған Албания президентіне алғысын айтты

Мемлекет басшысы Қасым-Жомарт Тоқаев Қазақстанға ресми сапармен келген Албания президенті Байрам Бегаймен шағын құрамда келіссөз жүргізді. Бұл туралы Ақорда Telegram-дағы ресми арнасында хабарлады.

Кездесуде мемлекет басшысы шақыруын қабыл алып, Қазақстан астанасына келгені үшін Албания президентіне алғыс айтты.

"Бұл – тарихтағы Албания президентінің Қазақстанға жасаған алғашқы сапары. Сіздің ресми сапарыңыз өзара ынтымқатастықты дамыту тұрғысынан өте маңызды. Қазақстан сіздің еліңізбен тығыз қарым-қатынас жасауға ниетті.

Біз екі тараптың мүддесіне сай келетін көптеген салада өзара тиімді ынтымақтастықты дамытуға мүмкіндік мол деп санаймыз. Екі аптадан соң елдеріміз арасындағы дипломатиялық қарым-қатынастың орнағанына 30 жыл толады. Сіздің сапарыңыздың осы айтулы датамен тұспа-тұс келуінің символдық мәні бар", – дейді президент.

Өз кезегінде Байрам Бегай Астанаға шақырғаны және қонақжайлық көрсеткені үшін Қасым-Жомарт Тоқаевқа ризашылығын білдірді.

"Қазақстанға сапармен келгенім үшін өте қуаныштымын. Арнайы шақырғаныңыз үшін сізге ризашылығымды білдіремін. Өзіңіз айтқандай, бұл сапар дипломатиялық байланыстарымыздың 30 жылдық мерейтойымен тұспа-тұс келіп отыр.

Бұл біздің саяси қарым-қатынасымыздың жоғары деңгейде екенін көрсетеді. Енді экономикалық ынтымақтастығымызды одан әрі нығайту үшін жаңа мүмкіндіктер тауып, бірлесе жұмыс істеуіміз керек. Сізді Албанияға сапармен келуге шақырамын", – дейді ол.

Естеріңізге сала кетейік, бүгін Албания президенті Байрам Бегай Қазақстанға ресми сапармен келді. Кейін оны Ақордада салтанатты түрде қарсы алу рәсімі өтті.