Тоқаев Түрікменстан президенті Сердар Бердімұхамедовке құттықтау жеделхатын жолдады

Мемлекет басшысы Қасым-Жомарт Тоқаев Түрікменстан президенті Сердар Бердімұхамедовті және Түрікменстан халқын Тәуелсіздік күнімен құттықтады. Бұл туралы Ақорда Telegram-дағы ресми арнасында хабарлады.

"Қазақстандықтар Түрікменстанның зор жетістіктеріне шын ниетпен тілеулес және екі ел арасындағы ғасырлар бойы жалғасып келе жатқан достық, тату көршілік қатынастар мен жан-жақты ынтымақтастықты нығайтуға ерекше мән береді", - деп жазылған жеделхатта.

Сонымен қатар мемлекет басшысы өзара бірлескен күш-жігердің нәтижесінде қазақ-түрікмен стратегиялық серіктестігінің көкжиегі кеңейіп, көпжақты қарым-қатынастың даму қарқыны арта түсетініне сенім білдірген.

Сондай-ақ Қасым-Жомарт Тоқаев Сердар Бердімұхамедовтің жауапты мемлекеттік қызметіне табыс, ал бауырлас Түрікменстан халқына бақ-береке тілеген.