Тоқаев Германияның президентімен кездесті (видео)

Президент Қасым-Жомарт Тоқаевтың Германия Федеративтік Республикасына ресми сапары жалғасып жатыр. Мемлекет басшысы Германияның Федералдық президенті Франк-Вальтер Штайнмайермен кездесті, деп хабарлайды Ақорда Telegram-дағы ресми арнасында.

Президенттің баспасөз қызметінің хабарлауынша, мемлекет басшысы Bellevue резиденциясына келді. Қасым-Жомарт Тоқаевты Германияның Федералдық президенті Франк-Вальтер Штайнмайер қарсы алды.

Сонымен қатар мемлекет басшысы Қасым-Жомарт Тоқаев Германия президентінің резиденциясында Құрметті қонақтар кітабына естелік қолтаңба қалдырды.

Тараптар Германия Президентінің таяуда Қазақстанға жасаған сапары аясында қол жеткізілген уағдаластықтардың жүзеге асырылу барысын қарастырды.

Атап айтқанда, энергетика, транзит, логистика, пайдалы қазбаларды игеру, жаңартылатын энергия көздері, ауыл шаруашылығы және цифрландыру секілді ынтымақтастықтың басым бағыттарына қатысты бірлескен жұмыстарды талқылады.

Келіссөз барысында мәдени-гуманитарлық байланыстарды, сондай-ақ екі елдің ғылыми және білім беру ұйымдары арасындағы қатынастарды нығайту мәселесіне баса мән берілді.

Қасым-Жомарт Тоқаев пен Франк-Вальтер Штайнмайер Қазақстан мен Германияның көпжақты ынтымақтастығын одан әрі нығайту үшін бірлескен іс-қимылдарды арттыра түсуге уағдаласты.