Тоқаев Тәжікстан президентін туған күнімен құттықтады

Мемлекет басшысы Қасым-Жомарт Тоқаев Тәжікстан президенті Эмомали Рахмонмен телефон арқылы сөйлесті, деп хабарлайды Ақорда ресми сайтында.

Әңгімелесу барысында Қасым-Жомарт Тоқаев Эмомали Рахмонды туған күнімен құттықтап, бауырлас Тәжікстанды дамыту жолындағы жауапты мемлекеттік қызметіне табыс пен бақ-береке тілеген.

Сондай-ақ мемлекет басшысы екі ел арасындағы стратегиялық серіктестікті нығайтуға Тәжікстан президентінің қосқан жеке үлесі туралы жоғары пікір білдірген.

Тараптар Қасым-Жомарт Тоқаевтың Душанбеге және Эмомали Рахмонның Астанаға жасаған сапарларының қорытындыларын да оң бағалаған. Бұл сапарлар қазақ-тәжік қатынастарының ерекше сипатқа ие екенін көрсеткен.

Бұдан бөлек, президенттер өңірлік күн тәртібін, сондай-ақ трансшекаралық су көздерін пайдалану және сауда-экономикалық ықпалдастық мәселелері жөніндегі уағдаластықтардың жүзеге асырылу барысын талқылаған.