Top.Mail.Ru

Сайт нұсқасы

ru kz

Зектілері

Нұрлыбек Нәлібаев Тоқаевқа Қызылорда облысының даму қарқыны жөнінде баяндады

Опубликовано:

Қасым-Жомарт Тоқаев Қызылордадағы өндіріс орнында
Қасым-Жомарт Тоқаев Қызылордадағы өндіріс орнында. Фото: t.me/aqorda_resmi

Мемлекет басшысы Қасым-Жомарт Тоқаев Қызалорда облысындағы ресми сапарында Темірбетон бұйымдары зауытына барды. Өндіріс орнында облыс әкімі Нұрлыбек Нәлібаев президентке Қызылорда өңірінің әлеуметтік-экономикалық даму қарқыны жөнінде баяндады, деп хабарлайды Ақорда Telegram-дағы ресми арнасында.

Мемлекет басшысы барған "Құрылыс-көлік компаниясы" ЖШС биыл іске қосқан жобаның жалпы құны – 2,6 миллиард теңгені құрайды. Оның 370 миллион теңгесі "Даму" кәсіпкерлікті қолдау қоры арқылы қаржыландырылған. Комбинат күніне 200 текше метр темірбетон бұйымдарын өндіреді. Өндіріске қажетті шикізаттар жергілікті жерден алынады.

Сонымен қатар облыс әкімі Нұрлыбек Нәлібаев мемлекет басшысына аймақтағы кәсіпорындардан шығатын басқа да өнім түрлерін таныстырды. Олардың басым бөлігі – құрылыс саласы үшін аса қажетті материалдар.

Атап айтқанда, табақша шыны ("OrdaGlass" ЖШС), ПВХ-құбырлары мен фитингтер ("КНК Кемикал" ЖШС), каскалар ("NP-Consalting" ЖШС), плитка желімдері мен сәндік сылақтар ("Вега-Пром" ЖШС), жол және тротуар бордюрлерін, құм-керамзит блоктарын ("Садуакасов Ж.А" ЖК), қиыршық тастың әртүрлі фракцияларын ("Shalkiya Dolomite Operating" ЖШС), терезелер мен айналар ("Комфорт KZ" ЖШС), әк ("Орда строй маркет" ЖШС), кірпіш өнімдерін ("Мелиоратор" ЖШС) және тағы да басқа бұйымдарды шығарады. Сондай-ақ көрмеге "Dalatex" компаниясының текстиль бұйымдары, "Өркен Әлем" ЖШС шығаратын жеке қорғаныс құралдары қойылған.

Президент кәсіпкерлермен әңгімелесу барысында шағын және орта бизнесті өркендету үшін мемлекет тарапынан жан-жақты қолдау көрсетілетінін айтты.

Өндіріс орнында облыс әкімі Нұрлыбек Нәлібаев Мемлекет басшысына Қызылорда өңірінің әлеуметтік-экономикалық даму қарқыны жөнінде баяндады

"Қызылорда облысының жалпы әлеуметтік-экономикалық даму көрсеткіштерінде өсім байқалады. Атап айтқанда, өңдеу өнеркәсібі 115,8 пайызға (227 млрд.теңге), ауыл шаруашылығы 101,6 пайызға (157 млрд.теңге), құрылыс 126,4 пайызға (117 млрд.теңге), тұрғын үйлер салу 118,9 пайызға (618 мың ш.м), сауда-саттық 104,1 пайызға (531 млрд.теңге) артқан. Негізгі капиталға құйылған инвестиция көлемін биыл 472 миллиард теңгеге жеткізу жоспарланып отыр. Оның басым бөлігі жеке инвестицияларға тиесілі", - деді облыс әкімі.

Аймақ басшысының айтуынша, облыста "Жайлы мектеп" ұлттық жобасы аясында алдағы үш жыл ішінде 27 мектеп салу жоспарланған. Ол қазіргі кезде Қызылорда қаласында физика-математика бағытындағы мектеп-интернаты салынып жатқанын атап өтті.

"Емханасы мен онкологиялық бөлімшесі бар 300 орындық көпбейінді аурухананың, Қан орталығының құрылысы жүргізіліп жатыр. "Ауылдық денсаулық сақтауды жаңғырту" ұлттық жобасы аясында елді мекендерде 27 медициналық-амбулаториялық нысан салынып жатыр. Өңірде бірқатар спорт және әлеуметтік-мәдени нысан бой көтереді. Атап айтқанда, жуырда 7 мың орындық Орталық стадионның, жабық бассейні бар көпсалалы дене шынықтыру-сауықтыру кешенінің құрылысы басталады. Аудандарда шағын 11 дене шынықтыру кешенін салу үшін жергілікті бюджеттен 2,6 миллиард теңге бөлінген. Облыс орталығында салынып жатқан Өнер орталығы жыл аяғына дейін ел игілігіне пайдалануға беріледі", - деді ол.

Нұрлыбек Нәлібаев өңірдің тыныс-тіршілігін түлетуге жергілікті кәсіпкерлер де елеулі үлес қосып жатқанын айтты. Әлеуметтік нысандар салу, демалыс саябақтарын, ойын-спорт алаңдарын, үйлердің қасбеттерін жаңарту, аулаларды абаттандыру жұмыстары демеушілердің көмегімен жүзеге асырылып келеді.

Мақаланың түпнұсқасы: https://kaz.nur.kz/politics/2040413-nurlybek-nalibaev-toqaevqa-qyzylorda-oblysynyn-damu-qarqyny-zoninde-bayandady/