Қараша айының басында елімізге Франция президенті мен Венгрия премьер-министрі ресми сапармен келеді

Қараша айының басында елімізге Франция президенті Эмманюэль Макрон мен Венгрия премьер-министрі Виктор Орбан ресми сапармен келеді, деп хабарлайды Ақорда Telegram-дағы ресми арнасында.

Президенттің баспасөз қызметінің мәліметінше, 1 қарашада мемлекет басшысы Қасым-Жомарт Тоқаевтың шақыруымен Франция президенті Эмманюэль Макрон Қазақстанға ресми сапармен келеді.

Сапар аясында екі ел басшылары сауда-экономикалық, инвестициялық және энергетикалық ынтымақтастықты нығайту мәселелері жөнінде келіссөз жүргізеді. Сондай-ақ халықаралық және өңірлік күн тәртібіндегі мәселелерді талқылайды.

Сонымен қатар 2 қарашада Астана қаласына Мажарстан премьер-министрі Виктор Орбан ресми сапармен келмек.

Сапар барысында тараптар Қазақстан мен Мажарстанның сауда-экономикалық, инвестициялық және мәдени-гуманитарлық салалардағы ықпалдастығын одан әрі кеңейтуге қатысты келісөз жүргізеді деп жоспарланып отыр.

3 қарашада елордада Түркі мемлекеттері ұйымының (ТМҰ) мерейтойлық Х саммиті өтеді.

Жиынға Түркі мемлекеттері ұйымына мүше елдер - Әзербайжан, Қырғызстан, Түркия, Өзбекстан президенттері, сондай-ақ ТМҰ-ға бақылаушы мемлекеттер – Мажарстан мен Түрікменстан басшылары қатысады деп күтілуде.