10 жылға сотталған Кентаудың экс-әкімі екі жылға жетпей бостандыққа шықты

Түркістан облысындағы Кентау қаласының экс-әкімі Дәурен Мақажанов 10 жылға бас бостандығынан айырылған. Ал таяуда Желіде оның колониядан шыққаны туралы ақпарат пайда болды. Ақпаратты Алматы қаласы, Алматы облысы және Жетісу облысының ҚАЖК өкілдері растады, деп хабарлайды KAZ.NUR.KZ.

Мәлімет Kozachkov_offside Telegram-арнасында жарияланды. Онда экс-әкім 2022 жылы пара алғаны үшін 10 жылға сотталғаны және 1,5 жыл ғана жаза өтегені айтылады.

Жоғарғы сот Бас прокуратураның наразылығы бойынша экс-әкімнің әрекеттері алаяқтыққа қайта сараланғаннан, өйткені қадағалау органының пікірінше, шенеунік жәбірленушіден пара алмаған, бірақ оны алдаған.

Сотталушының жаза мерзімі 10 жылдан 5 жылға қысқарған. Сондай-ақ жазасы жалпы тәртіптегі колонияда өтеуге ауысқан. Осыдан кейін өтелген жаза мерзімі қайта есептеліпті.

"Осыдан кейін Мақажанов сотқа жазаны ауыстыру туралы өтінішпен жүгінді – заңнамамызда осындай нұсқа бар. Егер жазаның үштен бір бөлігін өтесе, онда қалған бөлігін айыппұлға ауыстыруға өтініш бере аласыз. Қонаев қаласының соты бұрынғы әкім өз жазасын өтеді деп ұйғарды. Дереккөздердің хабарына қарағанда, экс-шенеунік осы жылдың қыркүйегінде бостандыққа шыққан", - делінген жарияланымда.

Алматы қаласы, Алматы облысы және Жетісу облысы бойынша ҚАЖД өкілдері NUR.KZ тілшісіне Дәурен Мақажанов колониядан шыққанын растады.

"Биыл 8 қыркүйекте Қапшағай қалалық сотының бас бостандығынан айыру түріндегі жазаны айыппұлға ауыстыру туралы қаулысы негізінде сотталған Дәурен Мақажанов Заречный кентіндегі №57 мекемеден шығарылды", - деп хабарлады ведомствоның баспасөз қызметі өкілдері.

Дәурен Мақажановтың ісі

Кентау әкімі 2022 жылдың ақпанында ұсталды. Ол өзінің сенімді адамдары арқылы мемлекеттік-жекеменшік шарт аясында автожолдарды жөндеумен айналысатын ЖШС директорынан 98,5 мың АҚШ доллары көлемінде пара алды деп айыпталған.

Тергеуді Алматы қаласы бойынша Антикоррупциялық қызмет өкілдері жүргізген. Күдікті соттың санкциясымен қамауға алынған.

Сол жылдың шілдесінде Дәурен Мақажановқа қатысты үкім шықты. Ол аса ірі көлемде пара алғаны үшін кінәлі деп танылып, максималды қауіпсіздік қылмыстық-атқару жүйесі мекемелерінде жазасын өтеумен 10 жылға бас бостандығынан айырылды.

"Сот сотталушы лауазымды тұлға бола отырып, өзінің қызметтік жағдайын пайдалана отырып, ЖШС директорын оған қамқорлығы үшін 50 млн теңге көлемінде ақшалай сома беруге мәжбүр еткенін анықтады. Осыдан кейін ол заңсыз сыйақы алу үшін таныстарының көмегіне жүгінген, олар ақша алған кезде ұсталған", - делінді соттың хабарында.

Іс бойынша тағы екі адам сотқа тартылған. Олар жемқорлыққа делдал болғаны үшін сотталды. Біреуі бір жылға, екіншісі 1,5 жылға сотталған. Дәурен Мақажанов сот үкімімен келіспей, апелляцияға өтінім жазған, алайда сот шешімі өзгеріссіз қалған.