"Ақша жұмыс істеуге тиіс": Ұлттық банк зейнетақы активтерін инвестициялау тетігін түсіндірді

Ұлттық банк төрағасының орынбасары Әлия Молдабекова БЖЗҚ қаражатын инфрақұрылымға инвестициялау тетігі туралы айтып берді, деп хабарлайды KAZ.NUR.KZ тілшісі реттеушінің баспасөз қызметіне сілтеме жасап.

БЖЗҚ салымшыларының қаражатын "Бәйтерек" пен "Самұрық-Қазына" квазимемлекеттік компанияларының облигацияларына инвестициялау жоспарланып отыр. Жоспар 2023-2024 жылдары жүзеге асырылмақ.

"Бәйтерек" ҰБХ" АҚ және "Самұрық-Қазына" ҰӘҚ" АҚ нарықтық шарттарда облигациялар шығарады, ал БЖЗҚ осы бағалы қағаздарға қаражат салады. Бұл құрал толығымен ашық тетік болып табылады. Облигациялар Қазақстанның қор биржасына шығарылады», – деді Ұлттық банк төрағасының орынбасары.

Өз кезегінде, квазимемлекеттік компаниялардың өздері оларды өңдеу өнеркәсібіндегі және экономика үшін маңызды басқа да салалардағы ірі жобаларды қаржыландыруға бағыттайды.

"Ақша жұмыс істеуі керек екенін бәріңіз білесіздер, әйтпесе оны инфляция құнсыздандырады. Осыған байланысты БЖЗҚ-ның зейнетақы активтері алынбайды және жұмсалмайды, бірақ шетелдік активтерге де, ел ішіндегі активтерге де нарық жағдайында үнемі инвестицияланатын болады", – деді Әлия Молдабекова.

Мәтіннен қате тапсаңыз, бізге жазыңыз