Светлана Жақыпова еңбек және халықты әлеуметтік қорғау министрі қызметіне тағайындалды

Мемлекет басшысының Жарлығымен Светлана Қабыкенқызы Жақыпова Қазақстан Республикасының еңбек және халықты әлеуметтік қорғау министрі лауазымына тағайындалды. Бұл туралы Ақорда Telegram-дағы арнасында хабарлады.

"Мемлекет басшысының Жарлығымен Светлана Қабыкенқызы Жақыпова Қазақстан Республикасының еңбек және халықты әлеуметтік қорғау министрі лауазымына тағайындалды", - делінген хабарда.

"Параграф" ақпараттық жүйесінің мәліметінше, Светлана Жақыпова 1991 жылы Целиноград мемлекеттік педагогикалық институтын, 2006 жылы Алматы экономика және статистика академиясын бітірген.

Еңбек жолын бастаушы мектепте ұзартылған күн тобының тәрбиешісі және бастауыш сыныптардың мұғалімі болып бастаған. Кейін орта мектепте математикадан сабақ берген.

1997-1998 жылдары – "Зейнетақы төлеу жөніндегі мемлекеттік орталық" РМҚК-ның Ақмола қалалық бөлімінің операциялық есеп жүргізу бөлімінің бас маманы, аға маманы болған.

Кейін әр жылдары келесі қызметтерді атқарған:

• "Зейнетақы төлеу жөніндегі мемлекеттік орталық" РМҚК-ның Ақмола (Астана) қалалық филиалының экономикалық талдау бөлімінің бас маманы, бастығы, директорының орынбасары;
• "Зейнетақы төлеу жөніндегі мемлекеттік орталық" РМҚК-ның Ақмола облыстық филиалының директоры; Еңбек және халықты әлеуметтік қорғау министрлігі Әлеуметтік қамсыздандыру және әлеуметтік сақтандыру департаменті директорының міндетін атқарушы, директоры;
• "Ұлттық ақпараттық технологиялар" АҚ Жобалау кеңсесінің бағдарламалар жетекшісі; Еңбек және халықты әлеуметтік қорғау вице-министрі.
• 2014 жылғы 13 тамызда Денсаулық сақтау және әлеуметтік даму министрінің орынбасары болып тағайындалды. Светлана Жақыпова бұл қызметте 2017 жылдың қаңтарына дейін жұмыс істеді.
• 2017 жылы ол қайтадан Еңбек және халықты әлеуметтік қорғау вице-министрі болып тағайындалды. Бұл қызметтен ол 2019 жылдың 26 ​​қыркүйегінде босатылды.
• Ал 2023 жылдың маусымында халықтың әлеуметтік жағынан осал санаттарының құқықтары жөніндегі уәкіл лауазымына тағайындалды.