Экология министрі өз орынбасары ұсталды деген қауесетке қатысты пікір білдірді

Экология министрі Ерлан Нысанбаев сенат кулуарында орынбасары Мансұр Ошурбаевтың ұсталғаны жөніндегі қауесетке пікір білдірді. Бұл туралы KAZ.NUR.KZ хабарлайды.

Журналистер Ерлан Нысанбаевтан экология және табиғи ресурстар вице-министрі Мансұр Ошурбаев қамауға алынғаны туралы ақпарат қаншалықты рас екенін сұрады.

"Дубайдағы Қазақстан павильонының осы шараға дайындалуын тексеру аясында оның кеңсесінен құжаттар алынды. Ол куәгер ретінде тартылды", - деді Ерлан Нысанбаев.

Министрдің айтуынша, оның орынбасарына айып тағылмаған, ол іске куә ретінде қатысып жатыр.

"Ол - куәгер, бұлтартпау шарасы жоқ, қазір жұмыста", - деді ол.

"Осы жағдайға байланысты вице-министр қызметінен айырылып қалуы мүмкін бе?" деген сұраққа Нысанбаев шешім тергеу нәтижесі бойынша қабылданатынын айтты.