Тоқаев балалардың қауіпсіздігі туралы заңға қол қойды

Мемлекет басшысы Қасым-Жомарт Тоқаев балалардың қауіпсіздігі туралы заңға қол қойды. Бұл туралы Ақорда хабарлады.

"Мемлекет басшысы "Қазақстан Республикасының кейбір заңнамалық актілеріне білім беру, тәлімгерлік және балалардың қауіпсіздігі мәселелері бойынша өзгерістер мен толықтырулар енгізу туралы" Қазақстан Республикасының Заңына қол қойды", - делінген Ақорда хабарында.

ҚР Парламенті Сенатының ресми сайтының ақпараты бойынша, бұл заңның негізгі міндеттері балалардың қауіпсіздігін қамтамасыз етумен, жетімдерге арналған тәлімгерлік институтын енгізумен және білім беру ұйымдарының басқарушылық еркіндігін кеңейтумен байланысты.

Осылайша, балалардың қауіпсіздігін қамтамасыз ету үшін терезелердің ашылуына тосқауыл қоятын арнайы механизмдерді терезелерге міндетті түрде орнату бойынша заңнамалық талаптар белгіленеді, мектептер, балабақшалар мен ауруханалар құрылысын есепке алмай, көпқабатты тұрғын үйлердің құрылысына тыйым салынады.

Ата-аналар үшін маңызды жаңалық - балабақшаларда орын берудің бірыңғай кезектілігін және мектептерде ұялы телефон пайдалану ережелерін белгілеу. Сонымен қатар сенаторлар мақұлдаған заңға сәйкес, қазір кәмелетке толған азаматтар балалар үйінде тұратын жетім балаларға тәлімгер бола алады. Кандидаттардың осы өтеусіз қызметке қойылатын талаптары, құқықтары мен міндеттері де құжатта көрсетілген.