Макрон Тоқаевты Елисей сарайында қалай қарсы алды (фото)

Франция Республикасына мемлекеттік сапармен келген президент Қасым-Жомарт Тоқаевты салтанатты қарсы алу рәсімі өтті. Бұл туралы KAZ.NUR.KZ Ақордаға сілтеме жасап хабарлайды.

Мемлекет басшысын әскери оркестрдің сүйемелдеуімен президент Эмманюэль Макрон қарсы алды. Қазақстан мен Францияның мемлекеттік әнұрандары шырқалды.

Президенттер республикалық гвардия, әуе-ғарыш, құрлық және теңіз әскерлерінен жасақталған Құрмет қарауылының алдынан жүріп өтті.

Бұдан кейін мемлекеттер басшылары Құрмет қарауылының салтанатты шеруін тамашалады.

Қасым-Жомарт Тоқаев пен Эмманюэль Макрон бір-біріне ресми делегация мүшелерін және құрметті қонақтарды таныстырды.

Айта кетейік, мемлекет басшысы Қасым-Жомарт Тоқаев Франция Республикасына 4 қарашада мемлекеттік сапармен келді. Париж әуежайында Қазақстан президентін Францияның сыртқы істер министрі Жан-Ноэль Барро қарсы алды.

Францияға мемлекеттік сапары алдында Le Figaro газетінде Қасым-Жомарт Тоқаевтың мақаласы жарияланды. Онда президент Астана мен Париждің бірлескен жобалары туралы сөз қозғап, Францияға мемлекеттік сапарының мақсаттары туралы айтқан.