Алматыда парламент сайлауы қалай өтіп жатыр (фото)

Бүгін Қазақстанда көптен күткен Парламент сайлауы өтіп жатыр. Алматыда сайлаудың алғашқы сағаттары дауыс берушілердің белсенді қатысуымен ерекшеленді. Сайлаушылардың арасында бірінші рет дауыс беруге келген азамат та, жасы 83-ке келген қария да бар деп жазады KAZ.NUR.KZ тілшісі.

Портал тілшісі байқағандай, оңтүстік астанадағы № 141 сайлау учаскесінде таңертеңнен бастап адам қарасы үзілер емес. Сайлаушылар дауысберу үшін кезекке тұруда.

Мәжіліс пен мәслихат депутаттарының кезекті сайлауы пандемия жағдайында өтіп жатыр. Сайлау учаскелері барлық санитарлық талаптарға сай қызмет көрсетуде. Кіре берісте сайлаушылардың дене қызуын тексереді.

Антисептик тұр. Учаскеге маскасыз келгендерге бетперде қарастырылған. Сондай-ақ комиссия мүшелері сайлаушылар арасындағы арақашықтық сақталуын бақылауға алған.

Келушілер кезекпен бюллетень алып, ортадағы жәшікке тастауда. Төр жақта екі қатар орындықтарға бақылаушылар жайғасқан.

Сайлау үчаскесіне қол ұстасқан ерлі-зайыптылар, жастармен қатар жасы үлкен қарттар да қатардан қалыспай ат басын бұрған.

Жасы 83-ке келген қарт әже де қызымен бірге дауыс беріп кетті.

Сайлаушылардың қатарында енді ғана кәмелет жасына толған алматылық Айбек Тоқтасын да бар. Ол бүгін алғаш рет сайлауға қатысып, таңдау жасады. Сайлау комиссиясы оған арнайы әзірлеген сыйын ұсынды.

"Мен бүгін бірінші рет дауыс беріп тұрмын. Таңдауымды айтпай-ақ қояйын. Бірақ бюллетеннен партия атауын тауып, белгілегенде өзімді еліміздің болашағы үшін маңызды шешім қабылдап жатқандай сезіндім", - дейді Айбек.

Түске дейін сайлау жәшігінің жартысы толуға шақ қалды.

Айта кетсек, Қазақстан тәуелсіздік алғалы бері елде жеті рет парламент сайланды. Парламенттің төменгі палатасы – мәжіліс сайлауына елде ресми тіркелген алты партия қатысып жатыр.

Мәжілістің 107 депутатының 98-ін партиялық тізім бойынша төте дауыс беру жолымен сайлаушылар сайласа, тоғызын Қазақстан халқы ассамблеясы іріктейді.

Мәтіннен қате тапсаңыз, бізге жазыңыз