Ноғаев президенттің тапсырмасынан кейін Маңғыстаудағы су тапшылығы мәселесі туралы айтты

Бүгін үкімет отырысында Маңғыстау облысының әкімі Нұрлан Ноғаев президент тапсырмасынан кейін өңірдегі су тапшылығына байланысты сұрақтарға жауап берді, деп хабарлайды KAZ.NUR.KZ.

"Жақында 2-3 күннің ішінде Мұнайлы ауданында сумен қамтамасыз ету жөнінде біраз келеңсіздіктер болды. Сорғыштың істен шығуына байланысты болды. Зауыт басшылығы, әріптестеріміздің шұғыл шараларының нәтижесінде ақау жойылып, Мұнайлы ауданына қажет деңгейде су жіберілді", - деді Маңғыстау облысының әкімі Нұрлан Ноғаев.

Сондай-ақ облыс әкімі "Каспий" су тұщыту зауытының алдағы жоспарлары туралы атап өтті.

"Каспий" су тұщыту зауытында тәулігіне 20 мың текше метр су дайындайтын құрылғылар жұмыс істеп тұр. Оны 40 текше метрге дейін көтеру жұмыстары жүзеге асырылып жатыр. Қазір құрылыс монтаждау жұмыстарының 80 пайызы аяқталды. Негізгі жабдықтарды орналастыру жөніндегі тапсырма берілді. Бізге тамыз айында су қондырғылары келе байстады. Содан бастап монтаждау жұмыстарымен айналысамыз. Қыркүйек айының соңына дейін монтаждау жұмыстарын аяқтып, қазан айында іске қосуды жоспарлап отырмыз", - деді ол үкімет отырысында.

Өңір басшысы толық жөндеу жұмыстары қазан айында бітетінін айтты.

"Сіз айтып отырған 5,6 млрд теңге біз үшін қомақты көмек. Маңғыстау облысы атынан ризашылығымызды білдіреміз. Біз 20 мың текше метрді қосқаннан кейін Мұнайлы, Қарақия аудандары, Ақтау қаласының бір бөлігін қосымша сумен қамтамасыз етуге мүмкіндігіміз болады", - деді өңір басшысы.

Айта кетейік, Қасым-Жомарт Тоқаев тұрғындардың шағымына байланысты Маңғыстау облысындағы тұщы су тапшылығын қысқа мерзімде шешуді тапсырған болатын.

Мәтіннен қате тапсаңыз, бізге жазыңыз