АЭС құрылысы бойынша референдум: дауыстарды санауға қанша уақыт кетеді

Орталық референдум комиссиясы төрағасының орынбасары Константин Петров ОСК-да өткен брифингте дауыстарды санауға қанша уақыт кететінін айтты. Бұл туралы KAZ.NUR.KZ хабарлайды.

Петровтың сөзінше, Қазақстанның барлық референдум өткізу орнында дауыс беру ресми түрде аяқталды.

"Учаскелік комиссиялар дауыстарды санауға кірісті. Референдум учаскелерінде дауыстарды санау уақыты, қолданыстағы заң нормаларына сәйкес, оларды санау басталғаннан кейінгі он екі сағаттан аспауға тиіс.

Аумақтық комиссиялар ертең таңертең электронды байланыс арналары арқылы Орталық сайлау комиссиясына өңірлердегі дауыс берудің алдын ала қорытындылары туралы хабарлайды", - деді Петров.

Еске салайық, 6 қазанда Қазақстанда АЭС құрылысы бойынша республикалық референдум өтті. Референдумға ұсынылған сұрақ: "Қазақстанда атом электр станциясын салуға келісесіз бе?" Қазақстандықтар "иә" немесе "жоқ" деген жауапты таңдады. Дауыс беру сағат 20:00-де аяқталды.

Орталық референдум комиссиясы жариялаған алдын ала мәлімет бойынша, 7 820 918 қазақстандық немесе халықтың 63,87 пайызы дауыс берді.

Мәтіннен қате тапсаңыз, бізге жазыңыз