"Еліміз қызығушылық танытып отыр": Тоқаев Қытай атом энергетикасында көшбасшы саналатын компанияның басшысымен кездесті

Жарияланған күні: 17 наурыз 2025, 15:10

Қасым-Жомарт Тоқаев пен Шэнь Яньфэннің кездесуі. Фото: akorda.kz

Мемлекет басшысы Қасым-Жомарт Тоқаев СNNC компаниясының бас директоры Шэнь Яньфэнді қабылдады, деп хабарлайды Ақордаға сілтеме жасаған KAZ.NUR.KZ.

Қытайдың Ұлттық ядролық өнеркәсіп корпорациясының (СNNC) басшысымен кездесуде атом энергетикасы саласындағы ынтымақтастық перспективасы талқыланған.

Қасым-Жомарт Тоқаев Шэнь Яньфэнге Қазақстанның аталған саланы дамыту жөніндегі жоспарын таныстырып, таяуда Ядролық энергетика агенттігін құру туралы маңызды шешім қабылданғанына назар аударған. Бұл ұлттық экономика алдындағы стратегиялық міндетті жүйелі түрде жүзеге асыруды көздейді.

Қасым-Жомарт Тоқаев пен Шэнь Яньфэн. Фото: akorda.kz

Президент Қытай Халық Республикасының атом энергетикасында көшбасшы саналатын CNNC тәжірибесіне еліміздің қызығушылық танытып отырғанын айтты.

Шэнь Яньфэн мемлекет басшысына компанияның Қытайдағы және одан тысқары жерлердегі жобалары туралы мәлімет берген.

Әңгімелесу барысында атом энергиясын бейбіт мақсатта пайдаланатын озық технологияларды зерделеу және қазақстандық мамандарды оқыту бағытындағы ықпалдастық мәселелері қарастырылған.

Мақаланың түпнұсқасы: https://kaz.nur.kz/politics/kazakhstan/2228717-toqaev-qytai-okilimen-atom-energetikasy-salasyndagy-yntymaqtastyq-perspektivasyn-talqylady/