"Екі аптада бір рет баяндап отырады": Тоқаев Алматы әкімі Досаевқа бірқатар тапсырма берді

Президент Қасым-Жомарт Тоқаев Алматыға жұмыс сапары кезінде қала әкімі Ерболат Досаевқа қаланың дамуына қатысты бірқатар тапсырма берген. Бұл туралы мемлекет басшысының баспасөз хатшысы Руслан Желдібай хабарлады.

Президент Алматыға жұмыс сапары кезінде қала әкімі Ерболат Досаевты қабылдап, шаһарды жарықтандыру, пәтерлерге суды уақтылы және толық беру, көшелер мен аулаларды абаттандыру бойынша бірқатар тапсырма берген.

"Бұдан бөлек, мемлекет басшысы "Таза Қазақстан" акциясын тұрақты әрі өз деңгейінде өткізудің, қаланы көгалдандырудың, экологиялық ахуалды жақсарту үшін көлік қозғалысын реттеудің, сондай-ақ алматылықтарды алаңдататын басқа да мәселелерді шешудің маңызын атап өтті.

Ерболат Досаевқа еліміздің ең ірі қаласының қаржы, спорт, туристік әрі мәдени хабы ретіндегі мәртебесін нығайту және тиісті тәртіпке келтіру үшін басқару қызметін күшейту тапсырылды", - деп жазды Руслан Желдібай Telegram-дағы арнасында.

Естеріңізге сала кетейік, 29 наурызда Өзбекстан президенті Шавкат Мирзиеев Қазақстанға жұмыс сапарымен келді. Мәртебелі мейманды Алматы әуежайында Қасым-Жомарт Тоқаев өзі қарсы алды.

Қала әкімі Ерболат Досаев президенттерге Іле Алатауының асқаралы шыңдарын көрсетіп, Кіші Алматы шатқалындағы "Медеу" селден қорғау бөгетін салу тарихы жөнінде айтты.

Сондай-ақ Қасым-Жомарт Тоқаев пен Шавкат Мирзиеев қала әкімінің еліміздегі ең ірі "Шымбұлақ" тау шаңғысы курорты жөніндегі есебін тыңдады.

Кейін Қазақстан және Өзбекстан президенттерінің бейресми кездесуі өтті.