Қазақстанда президент және әкім лауазымына үміткерлерге қойылатын талап күшейтілмек

Мәжіліс депутаттары "Қазақстан Республикасындағы сайлау туралы" Конституциялық заңға өзгерістер мен толықтырулар енгізу туралы" заң жобасын ілеспе түзетулерімен жұмысқа алды, деп хабарлайды KAZ.NUR.KZ.

Мәжіліс депутаты Снежанна Имашеваның айтуынша, заң жобалары президенттің сайлау жүйесін жетілдіру жөніндегі тапсырмасына сәйкес үкіметтің заңнамалық жұмыс жоспарына сәйкес әзірленген.

Депутат атап өткендей, конституциялық заң жобасының негізгі мақсаттары:

• Мәжiлiс депутаттығына бiр кандидатты бiрнеше сайлау округi бойынша ұсынуға тыйым салу;
• Бір адамның кандидатурасын мәжілістің бір мандатты округтерінде де, мәслихаттардың бір мандатты округтерінде де бір мезгілде ұсынуға тыйым салу;
• әкім лауазымына кандидаттың сайлау қорын құру.

Сондай-ақ президенттікке, депутаттыққа, әкім лауазымына, сайлау комиссияларының мүшелеріне үміткерлерге ауыр және аса ауыр қылмыстар үшін соттылығының болмауы туралы талаптарды күшейту ұсынылды.

Ілеспе заң жобалары сайлау өткізу рәсімдерін жетілдіруге, сондай-ақ сайлау заңнамасының нормаларын сақтамағандар үшін әкімшілік жауапкершілікті енгізуге бағытталған деп қорытындылады сөзін Снежанна Имашева.

Мәтіннен қате тапсаңыз, бізге жазыңыз