Қазақстанда бензин мен дизель отыны бағасын одан әрі көтеруге мораторий енгізілді

Премьер-министр президенттің азаматтар мүддесі үшін экономикалық реформалар бағдарламасын жүзеге асыруды ретке келтіру жөніндегі тапсырмаларын орындау мәселелері бойынша кеңес өткізді, деп хабарлайды Қазақстан үкіметіне сілтеме жасаған KAZ.NUR.KZ.

Кеңеске премьер-министрден бөлек, үкімет мүшелерінің, басқа да мемлекеттік органдар мен ұйымдардың басшылары қатысты. Жиын қорытындысы бойынша бірнеше шешім қабылданды.

Солардың бірі — бензин мен дизель отыны бағасын одан әрі көтеруге мораторий енгізу.

"Биыл 16 қазаннан бастап инфляция деңгейі тұрақтанғанға дейін АИ-92 маркалы бензин мен дизель отыны бағасын одан әрі көтеруге мораторий енгізіледі.

Премьер-министр Энергетика министрлігіне Бәсекелестікті қорғау және дамыту агенттігімен және өңір әкімдіктерімен бірлесіп, тиісті қадағалау жүргізуді, сондай-ақ ішкі нарықты ЖЖМ-мен үздіксіз қамтамасыз ету үшін қажетті шаралар қабылдауды тапсырды", - делінген үкіметтің ресми хабарламасында.

Мәтіннен қате тапсаңыз, бізге жазыңыз