Қазақстан вице-президентіне қойылатын талаптар Конституцияда жазылады

Әділет министрі Ерлан Сәрсембаев Конституциялық реформа жөніндегі комиссияның отырысында Қазақстанда жаңадан енгізілетін вице-президент лауазымына қойылатын талаптарды жариялады, деп хабарлайды KAZ.NUR.KZ тілшісі.

"Конституцияның тиісті бабында вице-президенттің өкілді органның депутаты болуға, басқа да ақы берілетін лауазымдарды атқаруына, кәсіпкерлік қызметпен айналысуға және саяси партиялардың мүшесі болуға құқығы жоқ екені қарастырылады.

Мұндай талап аталған лауазымның саясаттан бейтарап және кәсіби сипатын қалыптастырады. Вице-президент мемлекет басшысының нұсқауы бойынша елдің сыртқы саясаттағы өкілі болуды қамтамасыз етуге, негізгі мемлекеттік институттармен өзара іс-қимылды және азаматтық қоғаммен, ғылыми және мәдени қауымдастықтармен және сарапшылар қауымдастығымен диалогты дамытуға міндетті. Бұл өкілеттіктер ең негізгісі және оларды мемлекет басшысы одан әрі нақтылай алады", - деді Сәрсембаев.

Оның айтуынша, вице-президент лауазымын енгізудің артықшылықтарының бірі – мемлекеттік биліктің тұрақтылығы мен сабақтастығы. Президенттің өкілеттігі мерзімінен бұрын тоқтатылған жағдайда, вице-президент елді басқаруды уақытша өз қолына алады.

"Егер вице-президент өкілеттікті өз мойнына ала алмаса, ол Құрылтай төрағасына өтеді. Егер Құрылтай өкілі мойнына ала алмаса, ол премьер-министрге өтеді. Президенттің өкілеттігін өз мойнына алған адам вице-президент, Құрылтай төрағасы және премьер-министр қызметтерінен кетеді. Бұл жағдайда лауазымдарға Конституцияда белгіленген тәртіпке сәйкес жаңа адам тағайындалады", - деді министр Ерлан Сәрсембаев.

Мәтіннен қате тапсаңыз, бізге жазыңыз