Халық Кеңесі халықтың мүддесін білдіретін жоғары консультативтік орган болып бекітілмек

Конституцияның жаңа жобасында жаңа жалпыұлттық диалог платформасы – Қазақстанның Халық Кеңесі құрылатыны, ол Қазақстан халқы Ассамблеясы мен Ұлттық құрылтайдың стратегиялық функцияларын жалғастыратыны туралы бап бекітілмек.

Бұл Қазақстан халқының мүдделерін білдіретін, заң шығару бастамасы құқығына ие жоғарғы консультативтік орган болмақ.

Аталған өзгеріс Конституцияның VI бөлімі, 70 және 71-баптарында көрсетілген.

"1. Қазақстан Халық Кеңесі – Қазақстан Республикасы халқының мүддесін білдіретін жоғары консультативтік орган.

2. Қазақстан Халық Кеңесі Қазақстан Республикасының азаматтарынан құралады.

3. Қазақстан Халық Кеңесін құру, оның құрамын қалыптастыру тәртібі, өкілеттігі және қызметінің ұйымдастырылуы конституциялық заңда айқындалады.

71-бап

Қазақстан Халық Кеңесі:

1) мемлекеттің ішкі саясатының негізгі бағыттары;

қоғамдық келісімді, жалпыұлттық бірлік пен ынтымақты нығайту;

Қазақстан Республикасы қызметінің негіз құраушы қағидаттарын және жалпыұлттық құндылықтарды ілгерілету жөнінде ұсыныстар мен ұсынымдар әзірлейді;

2) Құрылтайға заң жобаларын енгізеді;

3) жалпыхалықтық референдум тағайындау туралы бастама көтереді", - делінген Конституцияда.

Еске салсақ, бүгін, 31 қаңтарда Конституциялық реформа жөніндегі комиссия Қазақстан Конституциясының жаңа жобасын таныстырды.

Конституцияның жаңа редакциясының алғашқы жобасы кіріспе, 11 бөлім және 95 баптан тұрады.

Мәтіннен қате тапсаңыз, бізге жазыңыз